Road widening project apektado na kan TEPO
Self-proclaimed environmentalist inapod na mga hipokrito Canaman, CSur – Apektado na an milyones peso na mga road widening project kan Department of Public Works and Highways sa Ciudad nin Naga apesar na gabos na proceso sa pagkua nin special tree cutting permit aprobado kan DENR mala ngani nagpoon na sa pagpurotol nin puon nin kahoy alagad liwat naman na-aabala huli kan sinangat na caso civil kan nagpapabistong environmentalist sagcod na nag-isyu nin temporary protection order (TEPO) an jusgado. Si Assistant District Engr. Richard Emmanuel Ragragio kan 2nd Engineering District kan DPWH sa Baras, Canaman, Camarines Sur nagpahayag sa entrevista kan Bicol Mail na kun mayong mga kaulangan sa implementasyon kan mga road widening project sa Ciudad nin Naga dapat tapos na ini kan taon 2017, matatapos naman an taon 2018 alagad an pinunan patrabajo padagos naaabala. Sa ibang mga banwaan sa Camarines Sur mayong nagcocontra sa pagpurotol nin kahoy nganing tawan nin buelo an road right of way mala ngani dakul na an completed project alagad sa Ciudad nin Naga iyo na sana an na-aabala. An DPWH pigmamandohan kan gobierno nasyonal sa lindong kan Build-build-build program ni Presidente Duterte na iimplementar an mga proyecto sa infrastractura orog na sa pagpahiwas kan mga tinampo mantang naghihibog an trafico huli kan dakul nang mga vehiculos alagad igwang mga kaulangan na dai man sinda dapat basulon kan publiko. An 2nd Engineering District na pinamamayohan ni District Engr. Rebecca Roces pigtagamahan nin P200 milyon sa mga widening project sa ciudad. Kan Agosto 2017 nag-aatubang nin TEPO na pig-isyu kan Regional Trial Court Branch 27 alagad mantang pig-iimplementar na ninda an special tree cutting permit (STCP) na pig-isyu kan DENR sa San Felipe-Pacol national road kan Ciudad nin Naga, duwang aldaw matapos ponan an patrabajo kan Septiembre 25 nakarecibe naman sinda nin TEPO hali sa corte na tolos man nindang pigsunod. An pig-isyung TEPO na may Civil Case No. 2018-0136 tolos nag-epekto kan Septiembre 28 sagcod sana sa 72 oras asin ‘’technically’’ puede nang ipadagos an pagputol kan poon nin mga kahoy alagad dai ninda gigibohon huli ta masunod sinda proceso kan jusgado, sabi pa ni Ragragio. An complainant sa caso civil iyo si Abogado Allan Reiz Macaraig asin an mga kinasohan sinda Director Virgilio Eduarte kan DPWH Bikol, Antonio Abawag kan DENR asin Alcalde John Bongat kan Ciudad nin Naga. Pagprotehir kan kapalibotan iyo an mayor na dahilan sa pagsangat nin caso contra sa sinambit na mga ahencia de gobierno. Dakul na an saindang naputol sa 98 kakahoyan base sa STCP. Naghihinanakit na an DPWH huli ta apesar lampas na sa duwang bulan an saindang pigpaskil na billboard kan STCP alagad kun kasuarin nagtatatrabajo na pigcuestion naman sa corte. Sinabi pa kan DPWH na mismo an mga residentes kan barangay an nagpapabor na putolon an mga kahoy na ulang sa saindang proyecto huli ta delicado pa sa mga aksidente kun matumbahan an saindang harong sagcod na ulang pa sa tinampo kun mapukan sa panahon nin calamidad. SELF PROCLAIMED ENVIRONMENTALIST INAPOD NA MGA HIPOKRITO Sa Ciudad nin Naga, kasunod kan mga ginigibong pagtitira sa face book contra sa opisyales lokal kan nagpapabistong mga enviromentalist huli sa isyu sa pagpurutol nin mga puon nin kahoy kan DPWH sa gilid kan national road, sa paagi nin entrevista kan media si Alcalde John Bongat binueltadahan man an sinambit na grupo na inaapod na self proclaimed environmentalist na grabe an ka-hipokritohan. Tinuyaw kan jefe ejecutivo an grupo na garo iyo na sana an nanga-ngataman kan kapalibotan alagad dai ngani naheheling nagpaparticipar sa mga tree planting sa bukid Isarog, dai ninda na-aaraman na an City Hall iyo an protector kan bukid Isarog sa paagi nin pag-destino nin mga bantay laban sa illegal logging. Afuera pa kaini, sa paagi kan programa sa Pilimenia ni First Lady Parah Bongat labi na sa treina mil an na-itanum sa bukid. Namumundo an City Hall apesar kan mga programa sa kapalibotan binali sinda sa caso civil na pigsangat sa corte apesar an envuelto sa pagputol kaini iyo an DPWH na igwang pig-isyung special tree cutting permit an DENR. Nagcocontra sinda sa proyecto kan gobierno an nangyayaring road widening pig-iimplementar sa enterong nasyon dapat maging pro-development man kita, sabi pa. An pagputol nin mga kahoy sa road right of way suportado na kan simbahan, mga barangay kan ciudad asin iba pang sektor mientras na kaipuhan nang mapahiwas an mga national road sa ciudad sa tahaw kan padagos na pag-asenso kaini. (dpa)