8th, 5th storey bldg. kan BMC mafuncionar na sa 2019-DOH

Matapos kan ginibong inagurasyon kan Department of Health (DOH) kan nakaaging Abril 27, 2018 sa bagong 8th asin 5th storey building kan Bicol Medical Center (BMC) nagseseguro na an ahencia na magiging operational na an duwang world class na edificio kan hospital sa masunod na taon 2019. Si DOH Undersecretary Nestor Santiago kan makaulay kan Bicol Mail nagsabi na igwa nang dating budget sa bagong edificio alagad pighahalat nalang an dugang na fondo sa 2019 na pigpapanday pa kan congreso para sa 2019 national budget asin kabali na digdi si pambakal nin dugang na mga medical equipment. Sinda DOH Secretary Francisco Duque, Usec Santiago, Congresista Gabriel H. Bordado Jr. kan tercer distrito kan Camarines Sur asin opisyales kan DOH Bicol iyo si mga naging bisita sa inagursyon ma-anom nang bulan an nakakaagi. An mga dating medical equipment sa lomang edificio ibabalyo sa mga bagong edificio nganing macompleto an facilidades asin an dugang na mga bagong ekipahes para sa hospital mientras iyo na ini an pinakadakulang hospital kan gobierno digdi sa rehiyon cinco. Naabala an pag-funcionar kan mga edificio na ginastosan kan nagtalikod na administrasyon ni Presidente Benigno Aquino III nin nagcacantidad P1.2 bilyon huli kan dai nagtutugot an Bureau of Fire Protection sa Ciudad nin Naga na mag-isyu nin occupancy permit kun an Operating Room namumugtak sa ika-tolong escalon. Nagpetisyon an manijamiento kan BMC sa pamamayo ni Medical Director Dr. Maria Estrella Litam sa opisina central kan BFP asin Department of Interior and Local Government (DILG) na naghahagad nin considerasyon na dai na halion an pigbugtak na OR sa ika-tolong escalon asin inaprobaran man giraray kan duwang ahencia dai palang nahahaloy. Si Chief Inspector Jose Callos, Fire Marshal kan BFP sa Ciudad nin Naga enot nang nanindugan na dai sinda ma-isyu nin occupancy permit kun dai ibabalyo sa groundfloor an OR. Saiyang pigpaliwanag sa BMC na kun mapabor sinda sa kagustohan kan manijamiento kan hospital sinda an maiipit huli ta malinaw na pagbalga sa Acta Republica 9514 kan Fire Code of the Philippines asin igwang sisimbagon an saiyang opisina kun dai iimplementar. Susog sa sinambit na ley tinutugot sana an OR sa groundfloor o kun dai man sa ika-duwang escalon, alagad sa BMC namumugtak sa ika-tolong escalon na pagsinutil sa RA 9514, sabi pa ni Callos. Si dating Juez asin Presidential Adviser for Bicol Affairs Marvel Clavecilla nagtahaw na sa controvercia sa BMC asin BFP ngani sanang maging operational na an pigsasabing world class na edificio kan hospital. An aksyon kan PABA iyo an paghagad sa BFP asin DILG na tawan considerasyon an kahurotan kan BMC asin sa ngonian inaprobaran na kan duwang ahencia sa central office. (DPA)