Malasakit Center ibubugtak kan OPAB sa BMC

Magkakaigwa nang ika-duwang Malasakit Center (MC) sa rehiyon cinco na ibubugtak sa laog edificio kan Bicol Medical Center tanganing dai na madificilan an mga sadiring tawo kan mga pasyente na naka-confined sa hospital kan gobierno sa paghanap kan mga ahencia de gobierno na mahahagadan ninda nin tabang finansyal. An Malasakit Center sarong one stop shop, programa ni Presidente Rodrigo Duterte na componido nin limang mga ahencia de gobierno na kinababalihan kan Philippine Charity Sweeptakes Office (PCSO), Department of Health (DOH), Department of Social Welfare and Development (DSWD), PhilHealth asin PAGCOR. Si Tommy Lee Jr., consultant kan Office of Presidential Adviser for Bicol Affairs (OPAB) asin Regional Coordinator VACC nagpahayag sa entrevista kan Bicol Mail, an MC hinagad ninda sa Malacañan na magbugtak digdi sa Camarines Sur asin an napiling lugar na bubugtakan na opisina iyo an BMC building mantang yaon digdi an ginatos na mga pasyente aroaldaw. An PCSO, DOH, DSWD, PhilHealth asin PAGCOR iyo an pigdudulokan kan mga pobreng tawo na mahagadan nin tabang sagcod sa lado finansyal para sa saiyang pasyente na naka-confined sa hospital kan gobierno maging sa pribadong hospital. Saiyang sinabi na dai palang nahahaloy binukasan na an opisina kan MC sa Bicol Regional Training and Teaching Hospital sa Ciudad nin Legaspi na naging juespe de honor iyo si Usec Bong Go na nagtaong fondo na nagcacantidad cinco milyones pesos. Si Usec Marvel Clavecilla kan OPAB pigtawan nin prioridad na magbugtak digdi kan MC nganing matabangan an mga pobreng pasyente asin dai na madificilan sa mga transaksyon ninda sa limang mga ahencia na hahanapon pa an mga opisina envez yaon na sa laog kan BMC building. An ibubugtak na opisina kan MC dapat igwang hiwas na 75 metro cuadrado asin 25 metro cuadrado para sa halatan kan mga cliyente. Dinagdag pa ni Lee piglalaoman na marerealisar an opisina kan MC sa pag-asumir sa puesto kan bagong Medical Director kan BMC na si Dr. Francisco Sales. (DPAureus)