Nasususpending mga alcalde sa CSur anas bakong kaalyado ni Migz

Pili, Camarines Sur - Nagkapera nang mga alcalde sa Camarines Sur an nasususpendi kan Capitolyo Provincial kan provincia alagad an mamundo kun bakong kaalyado sa politica ni Gobernador Migz Villafuerte perming tatamaan suspension.

Nakakaherak kan mga alcalde na basta bakong kaalyado daog sa mayoria perming suspendido an resulta napapa-krasar an development kan banwaan, sabi ni Vokal Russel Bañes, miembro kan junta provincial na nagrerepresentar kan premirong distrito kan Camarines Sur.

‘‘Pag-hirong-hirong may isususpende’’, sabi pa.

Si Bañes, miembro kan oposisyon asin candidatong bise gobernador nagsabi kun siya an manggana asin maging presiding officer dapat ibitaran na an mga suspension sa mga jefe ejecutivo mantang an apektado man sana iyo an banwaan nakakadamay pa an empleados huli ta napependiente an saindang sueldo kun igwa pang cuestion legal na nakaka-ulang sa transaksyon sa bangko maging sa mga opisina kan LGU.

An pinakahuri naman na kinastigo nin suspension iyo si Alcalde Nelson Bueza kan Garchitorena, Camarines Sur na singatan nin caso administrativo matapos magkuang pribadong abogado na dai nag-agi sa Sangguniang Bayan.

Maabot sa 80 empleado kan LGU dai nakasueldo kan nakaaging Oktubre 31 mantang dai pigmimidmid kan saindang municipal accountant asin tesurero an pagtukaw ni Bise Alcalde Nonoy Simando bilang acting mayor matapos makakua man soboot nin stay order hali sa Malacanan si Bueza.

Kabali pa sa enot na sinuspendi huli sa caso administrativo sinda Tomas Bongalota kan Pili, Camarines Sur, Bernard Brioso kan Libmanan, CSur asin Alcalde Jaime ‘’Manghay’’ Deleña kan Presentation, CSur anas bakong kaalyado kan jefe ejecutivo kan provincia.

Si Vokal Badong Simando, pamayo kan Special Committee on Administrative Case kan SP enot nang nagpahayag sa media na an saindang kinastigo nin suspension asin preventive suspension base sa mga evidencia na pigpresentar kan mga complainant.

Dapat magkaigwa na nin pagbabago asin kaipuhan an silag na pagpadalagan kan SP, saiyang pig-ehemplo an piggigibo nindang annual budget pigpipili sana an pigtatawan nin kopya orog na si yaon sa oposisyon.

An igwa sanang kopya iyo an chairman kan appropriation committee asin mga miembros kaini alagad nailulusot tolos kan super majority kan junta provincial.

Kun silag na an pagpadalagan kan SP an paghaman nin annual budget sa mga ginigibong committee hearing kaipuhan igwang sektores na naghahali sa senior citizen, youth, PWDs nganing yaon an saindang representasyon asin makabali kun anong programa nganing matawan budget allocation.

Nareparo pa kan vocal na kakadikit an pigtataong budget allocation sa agricultura apesar an Camarines Sur dakul an paraoma asin nabubuhay sa pagtanum asin paroyan.

Sala an polisya sa SP kun bakong kaalyado an vocal kan gobernador hahalian nin mga staff, arog ninda Salvador Señar kan tercer distrito, Butch Figuracion kan ika-limang distrito asin an unikong vocal kan premir distrito. (DPA)