Kgd sa CNorte binadil, iredo

Ki Ric Palacio

Paracale, Camarines Norte – Sarong re-eleksyonistang consejal sa banwaan na ini binadil iredo kan duwang dai pa mamidbidan na mga suspechado mantang palaog na sa saindang residencia na tolos dinalagan sa hospital asin dai nang peligro an buhay.

An biktima si Consejal Amalia Oco, 43 años, tinamaan nin sarong bala sa walang paa na pig-aaram pa kan mga awtoridad kun anong calibre an ginamit kan mga suspechado.

Sa imbestigasyon kan PNP, sinabi ni SPO2 Sheralyn Samonte opisyal na parataram kan PNP Provincial Office an insidente nangyari mga alas 11:30 nin banggui kan Martes, Noviembre 13 mantang an biktima nagmanijo kan saiyang land cruiser hali sa Daet, Camarines Norte mientras na yaon na sa parking space kan saindang residencia sa Poblacion, Paracale duwang dai mabistong lalaki an biglang nagkurahaw na ‘’pasok’’ na tolos pinaputokan nin badil sa tukawan kan chofer kan vehiculo.

An suspechado pirit na inagaw si bag na kapot-kapot ni Alma Ramos tugang kan biktima. An bag may laog nin cellphone, cuarta asin dokumentos.

Pigtutubodan kan pulisya na panghohold-up an motibo kan duwang suspechado na tolos man nakadulag.