SABI KAN UPLB RESEARCHER Paghalo nin mais sa bagas igwang dakul na bitamina
An Departamento de Agricultura (DA) asin an university researcher kan University of the Philippines Los Baños, Laguna (UPLB) pigrerecomendar na an ‘‘Rice-Corn Blend’’ o an paghalo kan bagas asin puting mais sa pagsapna aroaldaw kan familia mantang dakul na benepisyo nin bitamina an makukua sa sinapnang mais hababa pa sa asukar na dakulang tabang sa mga diabitiko.
Ini an pigtawan nin importancia kan mga resource speakers hali sa UPLB asin opisyal kan DA Bikol sa ginibong media briefing nganing ipaliwanag an makukuang karahayan sa salud sa pagsapna nin bagas na may halong puting mais.
An DA nagpahayag na igwa sindang teknologiya sa pagtanum nin mais asin iba pang asistencia sa mga paraoma nganing mapalangkaw an produksyon digdi sa Bikol.
Si Professor Felicito Rodriguez, University Researcher kan Institute of Plant Breeding sa College of Agriculture kan UPLB nagpahayag na kabali sa mga benepisyo sa mais iyo an pagiging mayaman kaini sa protina, mineral, carbohydrates asin antioxidants laban sa cancer asin alzheimer’s disease.
Kabali pa sa saiyang pigbiklad na benepisyo sa salud iyo an halangkaw sa fiber, may bitamina B1, marhay sa mga nagbabados huli ta igwang folate, imporanteng ingrediente sa nagkakaigwa nin diet sa mga diabitiko asin dakul pang iba.
Sa paghalo kaipuhan dapat 70 por ciento an bagas asin 30 por ciento an mais o duwang takad nin bagas asin sarong takad nin puting mais, sabi pa ni Rodriguez,
‘‘Igwang masiram na bagas arog kan dinurado alagad halangkaw an asukar kaini kun ikukumpara sa puting mais na moderato sana’’.
Sinabi pa ni Rodriguez na sa ginibong pag-aadal sa feeding program sa mga nag-eescuela sa elementarya nakatabang sa mga kaakian na malnourished kan regular na pakakanon nin bagas na may halong mais.
Si Dr. Candido Damo, national corn and cassava program coordinator nagpahayag man na dapat maging gawi na kan mga Bikolano an pagsapna na may halong mais mientras na saiyang pigsuportaran an paliwanag kan professor kan UPLB.
Sa sinambit na media briefing, si Lorenzo Alvina an regional corn program coordinator kan DA Bikol iyo man an nagpaliwanag kan kamugtakan kan industriya nin mais sa Bikol.
An problema sa rehiyon limitado an suplay, alagad inaalok man an mga cooperativa na pahiwason pa an saindang tanuman nin puting mais nganing magkaigwa nin halangkaw na produksyon digdi sa Bikol.
Sa mga provincia digdi sa rehiyon solamente an mga taga Masbate iyo an mahelig magsapna nin mais kaparejo man kan mga taga Cebu na iyo an saindang sinasapna aroaldaw.
Sa produksyon nin mais kan taon 2017 digdi sa rehiyon Bikol nagkaigwang 289,770 metrico tonelada hali sa 114,657 hektaryas sa average na 2.53 mt/ha.
Ngonian na taon saindang piglalaoman na magkakaigwang aning 297,015 metrico tonelada produksyon hali sa 114,921 hektaryas.
An rehiyon Bikol igwang 42 na corn clusters na compuesto nin 18,997 na miembros paraoma.
An ahencia nakatalaan pang pahiwason an produksyon nin mais sa Masbate sagcod na kapitalan nin facilidades nganing maging estable an presyo huli kan dakul an pangangaipo kaini sa mercado bako lang pambahog sa hayop envez sa panhalo sa sasapnaon na bagas aroaldaw. (DPAureus)