Pagsuhay kan Siruma-Tinambac cooperative district maagi sa AGMA

An kamawotan kan miembros-consumedores kan Siruma, Camarines Sur na magsuhay na sinda bilang saro sanang distrito kan Tinambac-Siruma kan Camarines Sur II Electric Cooperative (Casureco II) marerealisar na oras na maaprobaran sa pigtalaan na Annual General Membership Assembly (AGMA) sa Deciembre 8 na gigibohon sa JMR Coliseum, Ciudad nin Naga.

Tolong taon nang nakaagi igwa nang resolucion an Casureco II na naghuhurot isuhay na an Siruma sa Tinambac bilang saro sanang distrito alagad pigturogan sana sa opisina ni dating Administrator Edita Bueno kan National Electrification Administration (NEA) sagcod na naghali siya sa puesto dai pig-aksyonan.

Sinabi ni ISD Manager Rolando Pante, an ginibong proceso ngonian kan junta directiva liwat nagpasar nin resolucion kan Noviembre 13, 2018 na hinahagad sa NEA magsuhay na an sarong distrito kan Tinambac-Siruma.

Sa gigibohon na AGMA dapat maaprobaran nganing isumiter kan cooperativa sa NEA na pinammayohan ngonian ni Edgardo Masongsong na iyo an proceso nganing an miembros-consumedores kan banwaan nin Siruma igwang permanenteng director.

Si Jessie Delmoro na taga Siruma, CSur napili bilang director na nagrerepresentar kan Tinambac-Siruma District.

Alagad sinabi pa ni Pante an proceso dapat magpasar muna nin resolucion an junta directiva nganing magtalaan man nin district election sa bakante nang director sa Tinambac mantang si Delmoro taga Siruma.

Si Delmoro, haloy nang nagrereclamo sa manijamiento kan cooperativa sa maluyang serbisyo nin kuryente sa saiyang banwaan kaya ngani dapat lang magsuhay na sinda sa Tinambac para matawan man nin prioridad an mga reclamo kan saindang miembros-consumedores.

Nagtutubod si Pante na susuportaran sa pigtalaan na AGMA an resolucion kan junta directiva na gibohon nang saro man na distrito an banwaan nin Siruma. (dpa)