Suplay nin droga sa Bikol hali sa NBP

An dakulang pigsusuplay nin droga sa rehiyon cinco hali pa sa National Bilibid Prisons (NBP), sabi kan Philippine Drug Enforcement Agency (PDEA) digdi sa Bikol.

Ini an pigbuyagyag ni Sr. Supt. Christian Frivaldo jefe kan PDEA Bikol matapos saindang maarestar sa buy-bust operation an duwang mga Bicolano na may ka-transaksyon sa NBP asin nakumfiscar sa posisyon sa duwang suspechado an 1,000 gramos nin shabu na nagcacantidad nin P2.5 milyon sa ginibong operasyon ninda sa Cubao, Ciudad nin Quezon dai palang nahahaloy.

An mga nagkarakop iyo sinda Ernesto Rodriguez, 44 anos asin an saiyang kaibanan na si Teresa Concepcion, 60 años, parejong taga Ciudad nin Naga.

Nadificilan an saindang operasyon digdi sa Bikol kaya saindang pinagmarhay na gibohon an buy-bust sa Cubao, QC katuwang an grupo kan PDEA sa National Capital Region (NCR) asin Region V-A.

Sa inbestigasyon kan PDEA dai man naheheling an duwa na iyo an nagdadara kan suplay nin droga sa Bikol envez igwa na sanang nagbibitbit nganing disamulado an saindang transaksyon.

Inako kan mga suspechado na igwa sindang ka-transaksyon sa NBP alagad dai na pigngaranan kan PDEA nganing ipadagos pa ninda an haramon na inbestigasyon kan posibleng kasabuat na mga awtoridad asin prisonero.