Muslim sa CSur, Naga nagrurukyaw sa BOL


Mosque kan Muslin community sa Barangay Concepcion Pequeña, Ciudad nin Naga. (DPA)


Amay nagrurukyaw nin kaogmahan an Comunidad nin Muslim sa Ciudad nin Naga asin Camarines Sur sa nagluluwas na mga inisyal na resulta sa plebisito para sa ratipiskasyon kan Bangsamoro Organic Law (BOL), na haros landslide an resulta, sabi kan lider kan Muslim sa ciudad.


‘‘Good solution nganing mahali na an mga conflikto sa Mindanao, 80 por ciento ini na an solusyon sa problema sa rehiyon’’ Ini an mga pahayag sa Bicol Mail ni Mike Mustapa, presidente kan Maranao Guild for Solidarity. An BOL, pigponan kan panahon ni dating Presidente Benigno Aquino III na pasalamat man sinda sa dating pamayo kan nasyon na nakalusot man kuta sa Camara-Baja alagad nagpalyar sa senado. Ngonian pigpadagos ni Presidente Rodrigo Duterte huli ta mawot kaini matapos na an kariribokan sa Mindanao asin nagtutubod sinda na deretso na ini sa Federalismo, sabi pa. Si mga partial result kasoodma sa plebisito haros landslide asin orogmahon an grupo kan Muslim sa Ciudad nin Naga asin Camarines Sur na nag-aarapodan pa sinda sa telepono na nagpapahayag nin kaogmahan mala ngani igwa nang nakataram na mapuli na sinda sa Mindanao. Sa 35 banwaan asin duwang ciudades sa Camarines Sur 28 mga banwaan an igwang grupo nin Muslim asin digdi na sinda nag-eestar mantang matuninong na lugar an provinciang ini, segun pa ki Mustapa. Alagad sinabi pa ni Mustapa na hahalaton ninda kun nuarin ma-eestabliser an kamugtakan kan paz y orden asin economiya sa Mindanao asin digdi sinda madesisyon kun mabalik sa saindang pinaghalian na rehiyon. Kun igwang ibang lugar sa Sulu na gana an votong ‘’No’’ ok lang yan normal may magcocontra alagad mayoria an nagpahayag kan saindang pagsuporta sa BOL sa paagi kan ginibong plebisito. Saindang napag-araman na sa total na 26,986 na rehistradong votantes sa Ciudad nin Lamitan an nagvoto pabor sa BOL alagad 5,083 sana an nagsurat nin ‘’no’ sa plebiscite ballots. Sa banwaan nin Upi sa 23,247 na residentes nagvotong ‘’yes’’ para sa BOL mientras na 3,288 nagvotong contra. An mga provincia na dating yaon sa Autonomous Region in Muslim Mindanao (ARRM), na nagkaigwang plebisito iyo an Sulu, Basilan, Tawi-Tawi, Maguindanao asin Lanao Del Sur. Sinabi pa kan lider kan Muslim na nakakamayoria an pag-iriba nindang Muslim sa Mindanao na nasa 70 por ciento kumpara sa Catoliko na nag-aabot sana sa treinta por ciento. An Commission on Election nakatalaan taposon an escutenyo kan mga balota sa plebisito ngonian na semana. Alagad si Comelec Chairman Sheriff Abas nagpahayag man na an poll body, na iyo an National Plebiscite Board of Canvassers nag-aasegurar na macocompleto an canvassing antes kan Enero 26. (DPAureus)