Sektor nin transporte mapalangkaw flete

Magabat na sa sektor nin transporte kun magpako na nin labi sa P40 an cada litro kan crudo, digdi na sinda mapipiritan na magsangat nin petisyon sa Land Transportation Franchising and Regulatory Board (LTFRB) nganing mag-imponder na nin dugang na flete sa mga pasajeros kan jeepney. Sunod-sunod na an paglumpat kan presyo sa produkto nin petrolyo haros cada semana nagpaparabawas man an saindang aroaldaw na pagkayod an solusyon maghagad nin dugang na flete. Ini an mga pahayag ni Joel Pellogo, lider kan Condor sa Camarines Sur alagad antes kan petisyon magkakaigwa muna sinda nin consultasyon kun pera an hahagadon nindang dugang na flete. Kabali sa propuesto gibohon nang diez pesos an regular na flete hali sa dating P8.00 alagad sainda giraray pigcoconsiderar sagcod muna sa on peso. An padagos na paglangkaw kan presyo sa produkto nin petrolyo epekto na kan implementasyon kan ika-duwang excise tax kan Duterte administration. Nakadagdag pa digdi an halangkaw nang presyo sa mercado internasyonal dudugangan pa an excise tax an apektado iyo an publiko, sabi pa ni Pellogo. Dawa maglangkaw pa an flete, an saindang operator mahagad man nin dagdag kan saindang sinisingil sa cada pagkayod. Sa Metro Manila an plano kan sinambit na sektor maghagad nin dugang na dos pesos na flete. Namumundo an sektor nin transporte huli ta apesar kan pigplantiar na house bill sa congreso kan People’s Minority nin mga congresista na halion na an excise tax ngonian na taon alagad dai pigtawan prioridad kan presenting liderato sa Camara-Baja ni House Speaker Gloria Macapagal-Arroyo. An padagos na paglangkaw sa presyo kan lana bako lang an saindang sektor an apektado envez riding public, mga consumedores huli ta ciertong malangkaw man an presyo kan mga mayor na produkto sa mercado, sabi pa. Sa lado kan organisasyon nin mga trimobile sainda nang pig-oorolayan an paghagad nin dugang na flete alagad mahalat muna sa desisyon kan LTFRB sa isasangat na petisyon kan mga pampasajerong jeepney. Ano man na petisyon ninda sa paghagad nin dugang na flete yaon na sa desisyon kan sangguniang panlungsod/bayan. (dpa)