CE Palmiano paaram na sa City Hall, mabalyo sa UNC

PAKATAPOS kan 26 anos na serbisyo sa gobierno lokal paaram na sa City Hall puon nuodmang Viernes, Febrero l, 2019 nganing mag-aprobetsar kan early retirement alagad aagawon an oportunid na magbalyo sa pribadong institusyon.

Kinumfirmar sa Bicol Mail ni City Engr. Leon ‘’Chito’’ Palmiano IV na ultimo na niyang aldaw ngonian na Enero 31 sa opisina matapos magpa- aram na ki Alcalde John Bongat asin Bise Alcalde Nelson.

‘’Igwang sarong oportunidad na haloy nang pig-oopresir kan Ayala Education na maging Vice President for Administration kan University of Nueva Caceres (UNC), kaya nakiolay ako kan 2015 igilid muna hasta sa pag- edad kung 60 anos’’.

Sinabi pa na tamang- tama an presenting VP for Administration kan Universidad na si Leny Salumbre pahali na pasiring sa Estados Unidos.

Digdi na naghapot an Ayala Education kun interesado pa, maretiro man lang pig-take advantage ta igwa nang masisibogan, sabi pa ni Palmiano.

Si Assistant City Engr. Gaudencio Asis Jr. iyo an maribay sa puesto ni Palmiano alagad defende sa jefe ejecutivo kan ciudad kun manombra nin iba na hali sa laog kan departamento.

An pahalion na City Engr. nagplantiar muna kan saiyang vacation leave nganing gamiton si mga natatada pa niyang bakasyonan antes kan saiyang formal na pagreretiro sa edad na 60 anos sa bulan nin Abril 2019.

Siya naglimang taon sa opisina kan ADP bilang jefe kan electronics data kan City Hall asin nag-veinte uno anos sa City Engineer’s Office. (dpa)