Pagserbe kan subpoena ipinasa sa brgy. Tanod

NAGHIMO tolos nin solusyon an Municipal Trial Court in the Cities (MTCC) asin lokal na gobierno kan Ciudad nin Naga nganing maparikas an pag-serbe kan summary order/subpoena sa mga caso kriminal kasunod kan direktiba ni PNP Chief Director General Oscar Albayalde sa gabos na miembros kan PNP na pundohon na an pagserbe ninda nin mga subpoena huli ta bako ninda ining obligasyon.

An aksyon ipasa sa mga tanod sa barangay, ini an kasundoan sa paagi kan Memorandum of Agreement kan Peace and Order Council (POC) kan Ciudad nin Naga na pigrepresentaran ni Alcalde John Bongat, pamayo kan POC, na pig-asisteran ni Consejal Joselito Del Rosario an pamayo kan Peace and Order Committee sa Sangguniang Panlungsod asin presidente kan Brgy. Tanod Federation, Allan Tapar bilang mga first party; asin an MTCC na pigrepresentaran ni Executive Judge Margaret Armea, na pig-asisteran ni Clerk of Court Lorna Oira bilang second party.

Sa MOA an saindang iseserbing mga subpoena si mga caso kriminal sana na nagbabalga sa mga ordinansa na pigsangat sa tolong mga sanga kan MTCC.

Sinabi ni Alcalde Bongat na dakulang bagay an saindang MOA nganing maparikas an proceso kan mga caso na pendiente sa mga sala kan MTCC asin mahahale an mga natatambak nang caso sa corte.

An Task Force Comet saro sa nag-iimplementar kan mga ordinansa kan City Hall maheheling na digdi an resulta kan proceso asin estriktong ma-implementar an lokal na mga ley.

Sa ginibong perermahan sa MOA dai palang nahahaloy, sinabi ni Executive Judge Armea na makakatabang sa saindang sala an dakulang suporta kan POC kan City Hall mantang kulang sinda nin personajes asin hinali na sa trabajo kan PNP.

An orden kan PNP epektibo kan Oktubre 2018 na tolos man nag-aksyon an POC sa kahagadan kan MTCC kan Deciembre 6, 2018 nganing idesignar an mga piling miembros kan barangay tanod sa veinte sieteng mga barangay kan ciudad.

Sinabi ni Del Rosario an piling mga tanod nag- agi sa mga training asin seminar antes i-deputized asin makakarecibe sindang allowance sa cada iseserbing

summary order/subpoena. (dpa)