SA LIBMANAN, CSUR Isyu sa duwang alcalde tinapos na kan DILG V

Naresolberan na kan opisina rehiyonal kan Department of Interior and Local Government (DILG) sa Bikol an apat na bulan na pendienteng mga transaksyon finansyal kan lokal na gobierno kan Libmanan, Camarines Sur matapos saindang reconeceron si Bise Alcalde Rommel Bulaong komo acting mayor sa banwaan na ini. Inabot nin apat na bulan na pinasakitan an mga empleados na dai nakasueldo, kadamay an apat na bulan na pension kan maabot sa cinco mil na miembros kan senior citizens, mga dai nahahakot na tambak na basura sagcod pinutolan nin suplay nin kuryente kan Casureco uno an Municipal Bldg. huli sa inaabot na sa P905 mil pesos na morosidad. Si Abogado Anthony Nuyda, regional director kan DILG Bikol nagpaluwas kan saiyang certificasyon petsado Enero 29, 2019 nganing taposon na an paagawan nin puesto ninda Bulaong asin kan suspendidong alcalde na si Bernard Brioso. Dai nakasumiter si Brioso kan stay order hali sa Malacañan kasunod kan saiyang pigsangat na petition for review sa anom na bulan na suspension kan Capitolyo Provincial kan Camarines Sur. Si Bulaong, nakasumiter kan saiyang certificasyon na pig-isyu ni Gobernador Migz Villafuerte, petsado Enero 18, 2019 na huli sa caso administrativo ‘’grave misconduct, conduct of prejudicial to the service, and nepotism’’ na sinususpendi si Alcalde Brioso sa peryodong anom na bulan si Bulaong iyo an automaticong matukaw na alcalde kan LGU Libmanan. Antes kan aksyon kan DILG an organisasyon nin mga empleados kan LGU nagkaigwa nin sarong semanang prayer vigil sa atubangan na madiklom na Municipal Bldg. nganing hagadon an interbensyon kan Dios asin dai nahaloy nagkaigwa nang solusyon. An ibang empleados na habo nang magpasambit kan saindang pangaran nagsabi na saindang pigdedenuncia an mga opisyales lokal orog na si nasa likod kan suspension sa saindang alcalde na iyo si naging causa kan saindang problema sa sueldo maging kan iba pang mga transaksyon. ‘’Tatawan me sinda nin leksyon sa maabot na pirilian sa Mayo 13’’sabi pa. Saro sa nakatabang nganing maparikas an aksyon kan DILG iyo si Presidential Assistant for Bicol Affairs Marvel Clavecilla dawa na ngani naging matagas an mga panindugan kan mag-ibong na lado kan mga nag-iiriwal na opisyales lokal. Nagkaigwa sinda nin dialogue sa opisina kan PABA, dai nahaloy tinapos kan DILG Bikol an saindang problema. (dpa)