Singil sa buwis sa Ciudad nin Naga dapat babaan

An pagpababa kan sinisingil na buwis sa propriedad real saro sa dapat tawan prioridad sa Ciudad nin Naga sa tahaw kan dai na napupugolan kan padagos na pag-asenso kaini asin paglaog nin mga darakulang capitalista. Ini an naheheling kan negosyanteng si Fortunato ‘Tato’ Mendoza na nagcacandidatong alcalde sa maabot na pirilian sa Mayo 13, 2019 asin saiyang gigibohon kun manggana sa eleksyon mantang sa presenteng atmospera bako nang marhay sa sektor nin negosyante kun padagos an paglangkaw nin buwis. Mala ngani an Mitsubishi Motors Philippines Corporation na dating yaon sa Ciudad nin Naga nagbalyo na sa Pili, Camarines Sur huli ta mas hababa an pigsisingil na mga buwis bako lang sa propriedad real. Nagkapera nang mga capitalista enot nang nagplano na mabugtak kan saindang negosyo sa ciudad alagad huli kan halangkaw na buwis nagbalyo sa Pili, an kabesira kan provincia nin Camarines Sur. An Ciudad nin Naga saro na sa mga bilyonaryong ciudad sa nasyon sagcod na nagsakat na an 2019 annual budget kaini sa P1.3 bilyon. Afuera pa kaini, an Naga iyo na an commercial center sa Kabikolan huli kaini kaipuhan an tawan konsiderasyon kan lokal na gobierno an pagbaba kan buwis na iyo an saiyang gigibohon kun maging alcalde kan Naga, sabi pa ni Mendoza. Tinuyaw man kan nagcacandidatong alcalde an pigsasabing silag na pagpadalagan kan ciudad na bako man makatutubod. An planong pagpahuros kan singil sa buwis suportado man kan saiyang mga candidatong consejales na sinda Badeth Roco, Nathan Sergio asin Jose Tuason. Sa lado kan City Hall haloy na nindang pigpapaliwanag na mas halangkaw pa ngani an pigsisingil na buwis sa propriedad real sa ibang lugar sa Bikol. Sa ngonian dai na sinda nagdedefende sa internal revenue allotment (IRA) mantang nasa 60 por ciento kan saindang annual budget hali na sa saindang sadiring ingreso sa mga koleksyon sa buwis na ibinabalik sa tawo sa paagi nin mga proyecto.