Mga tinamaan tipdas dai nagpabakona

Walo (8) na an casong tipdas sa Ciudad nin Naga hasta kan Febrero 6 alagad napag-araman kan City Health Office (CHO) na anas dai sinda natawan ni bakona contra tipdas, posibleng huli sa controvercial na isyu sa dengvaxia vaccine na nagkaigwang truma an mga magurang. Padagos an ginigibong advocacia kan CHO na pinamamayohan Dr. Butch Borja nganing pakusogon an buot kan mga magurang nganing darahon sa mga health center an saindang mga aki para pabakonahan. Alagad huli kan nakaka-alarma na an caso sa tipdas mala ngani nagdeclara nang measles outbreak sa National Capital Region mantang sa ibang provincia naglalangkaw na an caso. Sinabi ni Dr. Borja, pinahiro na an saindang mga midwife asin health workers nganing maglansar nin mahiwas na pagbabakona sa mga aki mientras na igwa man sindang suplay kan vaccine. Nagpatanid pa an CHO na grabe an komplekasyon kan pasyente kun mapapabayaan pueding mahulog sa pheumonia, kaya hagad ninda an cooperasyon kan mga magurang na tawan nin vaccination sa tipdas an saindang mga aki. Dati-dati an tipdas nabotwa kun panahon nin tag-init alagad ngonian napaamay, sabi pa ni Borja. An walong caso sa Ciudad nin Naga considerado nang alarming mantang kan kaparejong peryodo kan Enero asin Febrero kan 2018 zero sa caso an ciudad. Sa ngonian an apat na casong tipdas yaon sa Barangay San Felipe asin tig-sararo sa mga barangay kan Cararayan, Sabang, Liboton, asin Concepcion Grande. Digdi sa Bikol igwa nang total na 54 caso, an Sorsogon iyo an may halangkaw na caso nag-abot na sa 22, Camarines Sur - 12 Masbate - 12, Albay – 5, Camarines Norte – 3 asin zero sa Catanduanes. Ipinahayag man kan DOH Epidemiology Bureau na an mga caso sa tipdas sa iba pang rehiyon, arog kan Cagayan Valley, Central Luzon, Ilocos Region, Calabarzon, Mimaropa, asin an rehiyon Bikol considerado nang naglalangkaw. (dpa)