NFA huhobaan trabajo

Pili, Camarines Sur – Huhobaan na nin regulatory function an National Food Authority (NFA) sa pag-isyu nin licenciya, pagmonitor sa presyo kan bagas sa mga mercado asin mayo nang mangyayaring pagsuplay ninda nin bagas sa rice retailers envez an saindang trabajo iyo an pagsaray nin bagas na binabakal ninda sa paraoma na maagi sa subasta. Kulang na sanang apod sa sinda bilang bodegero, ginatos na mga empleado an hahaklason sa serbisyo huli kan pagkaka-aprobar kan Rice Tarrification na saro nang ley matapos pirmahan ni Presidente Rodrigo Duterte an Senate Bill 1998, sabi ni Provincial Manager Alan Sabaybay kan NFA Camarines Sur. Hahalion na an pagpabakal ninda nin baratong presyo kan bagas sa mga lokal na gobierno, Department of Social Welfare and Development (DSWD), sa mga hospital kan gobierno asin sa BJMP. Sinabi pa ni Sabaybay, an magiging stock nindang bagas para sa food security na gagamiton encaso igwang calamidad asin sa iba pang pangangaipo kan gobierno. Huli kan bagong ley mayo na sa poder kan gobierno an pag-angkat nin imported rice envez itatao na sa mga pribadong negosyantes na iyo na an magdidikta kan presyo kan bagas sa mga mercado. An grupo nin mga empleados kan NFA haling rehiyon uno hasta cinco naglansar pa nin protesta sa Mendiola, Manila kan Febrero 14 nganing huroton ki Presidente Duterte na ibasura an Rice Tarrification Bill mantang ciertong apektado an sektor nin paraoma asin an empleados kan ahencia alagad dai dinangog. An Department of Trade and Industry (DTI) nagpaliwanag man na an ley iyo an simbag sa problema sa pagkulang kulang nin stock nin bagas sa bilog na nasyon. Saindang pig-oorgulyo an probisyon kan ley na makakatabang sa paraoma an pigtagamang P10 bilyon bilang rice comprehensive enhancement fund. Sa irarum kan Rice Tarrification Law, matatawan buelo kan gobierno an unlimited rice importation sa mga pribadong sektor karibay kan 35 por cientong tarifa cada shipment. Sinabi pa na bako lang paraoma an makikinabang envez an Filipino huli ta maresulta sa pagbarato kan presyo nin bagas sa mga mercado. (DPAureus)