SA PAKAWAT NIN BIKOL Diez mil na mga delegado madagsa sa Masbate City

Maabot sa diez mil na mga atleta, coaches, trainor asin opisyales kan Departamento de Edukasyon sa Bikol an madagsa sa Ciudad nin Masbate para sa nakatalaan na Pakawat nin Bikol (Palarong Bicol) 2019 na gigibohon an seremonya sa Domingo, Febrero 24. Matapos nin perang bulan na preparasyon an DepEd asin LGU Masbate, andam na an mga sports facilities na an mayor na venue kan karawat sa Masbate Sports Complex, sabi ni Direktor Rehiyonal Dr. Gilbert Sadsad kan DepEd Bikol. Sinabi kan DepEd dawa bakong arog kan mga facilidades sa Ciudad nin Naga asin Camarines Sur alagad an importante preparado na an lugar kan manlaen-laen na events. Pigseguro ni Sadsad kun igwa man nin mga elections related incident sa Masbate mantang nagrarani na an pirilian lokal sa Mayo 13, 2014 alagad dai man papakiaraman an mga atleta kan arin man na armadong grupo maging rebeldeng New People’s Army. An gabos na mga billeting centers igwang nakadestinong miembros kan kapupulisan na iyo an mamantenir kan paz y orden katuwang an mga barangay tanod. An division kan Camarines Sur asin Albay na iyo an nakapatos kan championship asin ika-duwang puesto sa nakaaging Pakawat nin Bikol kan 2018 piglalaoman iyo man giraray an maglalaban. Alagad an division kan Ciudad nin Naga na nag-ika tolo preparado an saindang atleta nganing makua an championship. Maparticipar sa Pakawat nin Bikol iyo an mga provincia kan Camarines Sur, Camarines Norte, Catanduanes, Albay, Masbate asin Sorsogon. Sa mga ciudades kinababalehan kan Naga, Iriga, Legaspi, Ligao, Tabaco, Masbate asin Sorsogon.