SA RICE TARRIFICATION LAW Industriya nin bagas luway- luway nang gagadanon

APEKTADO KAN RTL. Sadit na negosyante nin bagas nagbugtak na kan saiyang karatula “NO TO NFA ABOLITION” sa pagtubod na pasiring na sa pagtunaw kan National Food Authority huli ta hinalian sinda nin poder na mag-angat nin imported rice sagcod na dagos naman sinda mahahalian nin sadit na tiendahan bilang NFA rice retailers matapos aprobaran ni President Duterte an Rice Tarrification Law (RTL). (DPA)

Kun sa kanta ‘‘killing me softly’’, sa mga paraoma luway-luway nang gagadanon an industriya nin bagas matapos pirmahan ni Presidente Rodrigo Duterte an Rice Tarrification Bill na pigpadrenohan sa senado ni Senador Cynthia Villar, sabi kan lider kan sektor nin paraoma sa Bikol. Nagmumundo ngonian an sektor nin paraoma maging an mga empleados asin opisyal kan National Food Authority asin iba pang organisasyon na pusog nindang kinokontra an Senate Bill 1998 na saro nang ley matapos pirmahan ni Duterte kan Viernes, Febrero 15 asin saiya sanang sinikwal an manifesto sa panindugan kan Coalition of Farmers’ Organizations, Union, Retailers, and Rice Millers to Protect the Philippine Industry (FOURR PROTECT). Sa entrevista kan Bicol Mail ki Silvestre Bonto, Presidente kan National Confederation of Irrigators Association (NCIA), sinabi kaini grabe an epekto kan ley sa saindang sektor na mayormenteng mapapaboran sana kaini iyo an mayayaman nang negosyanteng bagas mantang puede na sindang mag-angkat nin bagas sa ibang nasyon na mas barato an presyo dai na babakalon an paroy kan mga paraoma. ‘‘Pagmayo nang delihencia an mga paraoma, mapipiritan na ipabakal nalang an saindang kaomahan asin sasalohon man ni Villar, siya an mabakal ta gigibohon nang subdivision. Kun dati an Filipinas inaapod na agricultural country alagad magiging nang subdivision country, iyan an mangyayari satuya’’ Sinabi pa sa ngonian an production cost sa Asia sa pag-oma inaabot sanang P5 hasta P11 cada kilo mantang digdi sa Filipinas inaabot nin P11 hasta P15, an mangyayari kaini mapako na sana an presyo kan paroy sa cantidad na P8. Kan magbisita sa Camarines Sur si Secretaryo Manny Piñol kan Department of Agriculture, sinabi kaini sa irarum kan probisyon kan ley igwang pigtagamang P10 bilyon Rice Comprehensive Enhancement Fund na gagamiton sa pambakal nin makinarya. Alagad dai man bensido digdi si Bonto huli ta dai man kaipuhan kan mga sadit na paraoma an mga makinarya. Pig-aadalan na kan FOURR PROTECT na cuestionon sa Corte Suprema an Rice Tarrfication Law huli ta dehadong marhay an mga paraoma na dagos nang gagadanon an industriya nin bagas sa nasyon an mabubuhay na sana an mga negosyante, sabi pa. Bilang aksyon kan sektor paraoma mantang panahon ngonian nin pirilian, mahiro na sinda nganing magcampaña na dai iboto si Senador Villar asin an enterong ticket kan mga candidatong senador na suportado ni Presidente Duterte. ‘‘An salot kan paraoma si Villar dai pagsuportaran kabale an mga candidatong senador kan administrasyon, salot ng magsasaka at mahihirap na Pilipino, samuyang kinokondenar si Villar asin Duterte’’ Sinabi pa na kabale sa apektado iyo an NFA huli ta mayo na sindang kontrol sa pag-angkat nin bagas envez yaon na sa mga darakulang negosyante na iyo an tatawan nin buelo. Kabale sa mga nakapirma sa manifesto contra sa ley na pinadara sa Malacañan, iyo an Philippine Farmers Advisory Board, National Confederation Irrigators Association, Federation of Patriotic Farmers, Nueva Ecija; Grains Retailers Confederation, Nueva Ecija Rice Millers, Balite Multi-purpose Cooperative, Alyansa ng Industriyang Bigas, Bulacan, Rice Millers, NFA Industry Services Department, NFA Employees Association, National Federation of Employees Association of the Departments and Agencies in Agriculture, Farmers Action Council Region 3, Provincial Farmers Action Countil asin iba pang organisasyon. (DPAureus)