Honesto, malinig na pirilian advocacia kan simbahan

Masikad na an karampanyahan sa mga candidato lokal sa Marso 29, an Archidiocesis nin Cacares sa Ciudad nin Naga, ipapadagos ninda an kampanya para sa ‘‘honest and orderly election’’ ini an advocacia kan simbahan na mapakarhay an dalagan kan maabot na pirilian sa Mayo 13, 2019.

Si Padre Louie Occiano, Direktor kan Caceres Commission on Communication (CCOM) nagsabi na mahalaga an desisyon kan electorado sa maabot na pirilian nganing makapili nin mga candidato na igwang marhay na record asin sincero kan saindang pagserbe kun yaon na sa puesto.

Nagkakalap an Caceres nin mga volunteers na magiging activong miembros kan Parish Pastoral Council (PPCRV) na makakatuwang kan simbahan kan saindang advocacia para sa onesto asin malinig na pirilian.

Sinabi pa kan CCOM na igwa nang pinaluwas na circular si Arsobispo Rolando Tria Tirona na nag-eenganyar an mga paraoquia sa Camarines Sur na magconducir nin mga political fora sa saindang parish level mantang sa archdiocesan level sinda an mapadreno sa mga candidatong congresista asin gobernador.

Sa paagi kan political forum digdi dadarahon sa publiko an mga kakayahan asin plano kan mga nagcacandidato asin dakul an saindang maaraman na mga isyu sa arin man na candidato tanganing pag-abot kan pirilian sa Mayo 13, aram na ninda kun siisay an dapat iboto.

Kabale sa advocacia kan CCOM iyo an liwat na pagpaluwas kan listahan kan Sampulong Tugon sa Responsableng Pagvoto.

Ini iyo an mga minasunod; 1. Magboto susog sa saimong concencia, 2. Igalang mo an desisyon kan iba sa pagpili kan candidato, 3. Midbidon mo an moralidad kan pagkatawo, kakayahan asin persona na capacidad kan mga candidato na naghahagad kan saimong boto, 4. Aramon mo an mga isyu, plataforma asin programa kan mga candidato asin partido na nagdadalagan sa pirilian, 5. Dai mo ibabakal an saimong boto, 6. Dai mo iboto an mga candidato na naggagamit nin badil, pwersa asin cuarta (guns, goons, gold), 7. Dai mo iboto an candidato huli lamang sa utang na boot, popularidad o pakikisama, 8. Dai mo iboto an candidato na may record nin pagiging kurapto o nagkukua kan fondo nin gobierno (graft and corruption), 9. Dai mo iboto an candidato na immoral asin mabisyo sa personal na buhay asin 10. Enot sag abos, isipon mi an karahayan kan satong banwaan asin nasyon sa pagpili kan candidato na saimong iboboto. (dpa)