Plea bargaining sa corte solusyon sa suroksokan na preso

Pueding makaluwas tolos sa carcel an mga nadadakop kan mga awtoridad na envuelto sa ilegal na droga alagad si nakukuanan sanang dikit na gramo nin shabu, cocaine, marijuana asin iba pang droga sa paagi kan plea bargaining sa corte.

Nagkapera nang mga nadakop sa Ciudad nin Naga an naka-aprobetsar kan plea bargaining na tinutugot na base sa pinaluwas na DOJ Department Circular No. 27.

Si Senior Asst. City Prosecutor Antonette Majella Sumayao-Nacor kan City Prosecutor’s Office sa Ciudad nin Naga nagpahayag sa entrevista kan Bicol Mail puede sanang maka-aprobetsar kaini iyo si mga nadadakop na first offender na nakuanan nin posesyon nin limang gramos nin shabu, cocaine, opium asin iba pang ilegal na droga mantang 300 gramos sa marijuana.

Sa mga district jail maging sa provincial asin municipal jail an may mga caso sa droga iyo an nakakapano kan presohan. Huli kaini, sa pag-aadal kan DOJ asin Corte Suprema saro sa solusyon iyo an plea bargaining, sabi pa ni Nacor.

An mga acusado sa dangerous drugs kaipuhan magsumiter kan saindang propuesto sa City Prosecutor’s Office na interesado na maglaog sa plea bargaining asin digdi na aadalan kan fiscalia kun sinda calificado base sa pigmamando kan DOJ Circular.

An rekomendasyon kan fiscalia isusumiter sa corte para sa saindang pinal na desisyon. Nagpatanid man an procujurador na si 2nd offender o perang veces nang nadakop sa ilegal na droga an dai na kabali sa makakaka-aprobetsar kan plea bargaining.

Kun si naka-aprobetsar na 1st offender alagad nagpasaway naman sa mga awtoridad huli sa caso sa droga, dagos na sindang malalaom sa carcel asin cocomplehan an caso oras na maprobaran kan jusgado, sabi pa ni Nacor.

Dinagdag pa kan procujarador si acusado puedeng mag-plea bargain sa section 12 kan RA 9165 asin ini si hababang penalidad sa casong possession of equipment, apparatus asin iba pang paraphernalia.

Alagad kun sa section 5 o pagpabakal na dai man gabos sa casong nagpapabakal calificado an saindang plea bargain si gramo sana nin shabu na kulang sa limang gramos asin sa marijuana kulang sa 300 gramos na puedeng mag-aprobetsar kan plea bargain sa irarum kan section 11.

Igwa man acusado na mawot mag-plea bargain alagad dai tinutugot sa circular sinda nacontra asin sainda giraray na pigsusumiter sa corte para sa saindang pinal na desisyon. (DPA)