NIA Bikol maadaptar na kan solar powered irrigation system


Solar Powered Irrigation System


Ma-adapatar na kan solar powered irrigation system (SPIS) an National Irrigation Administration (NIA) bako lang kan presenting irrigation canal mala ngani naghahanap na kan mga lugar na pueding bugtakan kan proyecto.

Si NIA Administrator Ricardo Visaya igwa nang direktiva sa mga opisina rehiyonal kan ahencia para madagdagan an presenting facilidades sa patubig asin minus gastos kun ma-implementar kan SPIS.

Si Ed Yu, parataram kan opisina rehiyonal kan NIA sa Bikol nagpahayag sa entrevista kan Bicol Mail na igwa nang direktiva sa sainda an administrador kan saindang opisina central sa tahaw kan kumfirmasyon kan Philippine Atmospheric, Geophysical and Astronomical Services Administration (PAGASA) na nagtatama na an El Niño Phenomenon sa nasyon poon ngonian na Marso hasta Hunyo.

Sa Bikol mayo pang pig-iimplementar na solar powered irrigation system an NIA asin kun igwa man iyo an Departamento de Agricultura (DA) sa mga banwaan kan Nabua, Bula, San Fernando asin sa Libmanan, gabos sa provincia nin Camarines Sur.

Katuyohan kan NIA na sabayan kan kaparejong proyecto an DA tanganing mapahiwasan an tanuman kan mga paraoma asin mapalangkaw an produksyon nin bagas.

An SPIS magastos sana an gobierno nin cinco milyones pesos alagad an lawig kan buhay kaini puedeng sundo sana sa veinte años bakong arog sa mga irrigation canal kan NIA habang buhay na proyecto para sa paraoma.

An pinakahuring SPIS kan DA naging operational kan huring semana kan Deciembre 2018 na naging recipiente an Bagadion Agri Organic Farmers Association Inc. sa Barangay Bagadion, Libmanan, Camarines Sur.

Sinabi pa ni Yu, pighahalat nalang ninda an pag-aprobar ni Presidente Rodrigo Duterte kan P3.7 Trillion na General Appropriation Act para sa ngonian na taon 2019.

An mga proyecto kan gobierno nasyonal padagos napependiente huli kan kawaran nin bagong GAA.

Dinagdag pa kan NIA Bikol na huli kan minamate na kan rehiyon an El Niño nagbababa na an water level kan saindang dam alagad dai paman apektado an saindang serbisyo nin patubig sa maabot sa 55 mil hektarya sa rehiyon. (DPA)