Protesta ni LRV vs Bordado, ibinasura

Tolong bulan antes kan pirilian sa Mayo 13, 2019 dagos nang ibinasura kan House of Representatives Electoral Tribunal (HRET) an sinangat na protesta ni dating Congresista Luis Villafuerte (NPC) contra ki Congresista Gabriel H. Bordado Jr. (LP) sa ginibong national asin local elections kan Mayo 9, 2016. Sa 31 pahinang desisyon kan HRET na binaba kan Febrero 7, 2019 asin narecibe sana kan mga abogado ni Bordado kan Marso 6 dai man na-inaan si voto kan congresista sa resulta kan rebisyon envez nagdugang pa nin 54 voto.

Afuera pa kaini, pigtawan doon kan HRET na dai man na-establiser na nagka-igwa nin fraud, irregularities o darayaan kan nakaaging pirilian.

Si Bordado nag-atubang kasoodmang aga sa press conference asin an saiyang mga abogado na sinda Atty. Rosario Airene H. Pasa, Atty. Irene C. Estrellado asin Fe Buelva nganing ipaabot sa media an pinaluwas na desisyon kan HRET.

Sinabi pa sa resulta kan birilingan sa tercer distrito kan Camarines Sur, base sa Provincial Board of Canvassers’ Certificate of Canvass si Bordado nakakua nin total na voto 100,127 contra ki Villafuerte na igwa sanang 81,074 na piglamangan nin 19,053 alagad sa rebisyon giraray nin voto nadagdagan si Bordado nin 54 voto.

Si Associate Justice kan Supreme Court Diosdado Peralta iyo an chairperson kan HRET asin oya si saindang desisyon, ‘’WHEREFORE, in accordance with the foregoing Rule 40, paragraphs 3 and 4 of 2015 HRET Rules, wherein the results of revision and appreciation by the Tribunal indubitably show that no reasonable recovery of votes was established by protestant, and that on the contrary, protestee’s winning margin further increased by fifty-four votes, the proclamation of protestee as the duly elected representative for the Third District of Camarines Sur is AFFIRMED and the instant election protest is DISMISSED without further proceedings.

Igwa pang deretso si LRV na mag-file nin motion for reconsideration alagad sinabi ni Atty. Pasa madiklom na an paglaom mantang entero nang nadiscuteron kan HRET si isyu na pigrereclamo kan protestant mala ngani sa desisyon envez na mabawasan nin voto si Bordado nadagdagan pa.

Nagkaigwa nin rebisyon mayo man nadagdagan si voto ni LRV, pano mababawi sa MR, sabi pa.

An protesta pigsangat kan Hulyo 13, 2016 na pigcucuestion an 368 kan 423 na clustered precincts kan tercer distrito kan CSur na compuesto kan Ciudad nin Naga, asin sa mga municipalidades kan Bombon, Calabanga, Camaligan, Canaman, Magarao, Ocampo asin Pili. (dpa)