Bikol, Quezon NPA nagsaro nang fuersa

Pili, Camarines Sur – Nagsarong fuersa na an rebeldeng New People’s Army (NPA) sa Bikol asin an provincia nin Quezon kun nalansar sinda nin operasyon sa rona mientras na nagkukulang na an saindang elementos.

Ini an pigbuyagyag kan 9th Infantry Division kan Philippine Army sa Bikol na may base sa Camp Elias Angeles, San Jose Pili, Camarines Sur huli ta nagluluya na an saindang movimiento asin kulang na nin suporta sa mga residentes kan barangay asin iba pang sektores.

Si Col. Paul Regencia, jefe kan Civil Affairs Division nagsabi sa Bicol Mail na maabot na sana sa sangatos an miembros kan rebeldeng NPA kaya kaipuhan na ninda magkaigwa nin reinforcement sa mga operasyon. Kadakli kan mga operasyon kan mga NPA yaon nalang digdi sa Bikol asin Quezon mantang ngonian na panahon nin pirilian naghihiro an fuersa nganing maka-implementar kan permit to campaign asin permit to win, sabi pa.

Sa kaparejong entrevista kan BM sa opisyal kan militar sa Bikol, sinabi kani na pabor sinda sa localized peace talk nganing taposon na an giera kan Filipino contra Filipino.

Alagad nagtutubod an militar na mas marhay na magsuruko nalang sinda nganing taposon an armed conflict dai na kaipuhan an orolay pang katuninongan.

Kun marealisar an localized peace talk kaipuhan magkua muna sinda nin passes asin ibaba an saindang mga armas.

Ngonian na panahon nin pirilian, sinabi pa na saindang pigtatawan nin prioridad an pagtarabangan ninda kan Philippine National Police tanganing magkaigwa nin matuninong na midterm election sa Mayo 13. Alagad saindang pinatanidan an mga candidato na dai magbayad kan hinahagad na PTC asin PTW kan mga kalaban kan gobierno. (dpa)