Gadgets binabawal na sa classrooms

An jefe ejecutivo kan Ciudad nin Naga nagpaluwas na nin Executive Order No. 2019-010 tanganing huruton sa mga administrador/principals sa gabos na mga pampublikong escuelahan sa elementarya asin high school sa ciudad na ibawal na an pag-gamit kan estudiantes sa electronic gadgets asin smart phones sa oras nin pagklase.

Sinabi ni Alcalde John Bongat katuyohan kan saiyang pinaluwas na EO nganing dai makadisturbo sa mga klase nin mga estudiantes na dapat tutokan an saindang pag-adal.

Tolos man nagpa-apod nin miting si Bongat sa School Board na presente an DepEd maging sa pribadong escuelahan na inatendiran kan representante kan Metro Naga Chamber of Commerce and Industry asin iba pang sektor na anas nag-aseguran nin suporta.

Sinabi man School Board Administrator Hernani Suron sa saindang miting puedeng tugotan an estudiantes na maggamit kun igwang gigibohon na research na kun haen makakatabang ini sa saindang leksyon.

An DepEd sa Ciudad nin Naga naogma sa Executive Order nganing iyo an saindang basehan sa pag-estricto na sa pagbawal nin pag-gamit nin gadgets asin smart phones asin ini makakatabang sa pagtutok kan estudiantes kan saindang pag-adal envez na magkawat nin gadgets.

An EO No. 2019-010 na pinirmahan kan jefe ejecutivo iyo an ‘’Urging the School Administrators/Principals of all public elementary and high schools in the City of Naga to ban the use of electronic gadgets and smart phones during class hours inside classrooms, unless allowed by the concerned classroom teacher for academic reasons.’’

Sinabi ni Bongat na nagkapera nang mga magurang asin paratukdo an nagrereclamo sa nagbaba nang grado nin estudiantes na pig-aatribuer sa adiksyon sa paggamit nin gadgets.

Alagad hinagad kan alcalde na dapat maging ‘‘good example’’ an paratukdo na dai man maggamit nin gadgets kasabay sa saindang klase sa classroom na iyo an pag-aarogan kan estudiantes. (dpa)