Manga nagadan na soldados kan 49th IB tinawan full military honor

Pili, Camarines Sur – Tinawan full military honor kan mga opisyal asin enlisted personnel kan 9th Infantry Division kan Philippine Army sa Bikol an apat na mga Bikolanong soldados na nagkagaradan sa saindang pakikipag-laban sa Maute group Mindanao.

An Bikolanong soldados sinda Cpl. Jojo Lim taga Balatan, Camarines Sur, Cpl. Mark Joy Belano kan Pili, CamSur, Cpl. Roque Santulan kan Ocampo, CamSur asin Pfc Christoper Baylon kan Labo, Camarines Norte nag-abot kasuodmang aga sa Naga Airport sa Pili, CamSur tinawan full military honor sa pangenot ni Major General Fernando Trinidad, pamayo kan 9th ID na may base sa Camp Elias Angeles sa banwaan nin Pili.

Afuera kan mga soldados kan 9th ID, sinabat sinda kan namumundong mga familia kan soldados na ipupuli sa saindang kanya-kanyang lugar antes ilubong.

An apat na anas mga soldados kan 49th Infantry Battalion kabali sa grupo kan walong mga soldados na nagkagaradan na nakipag-laban sa encuentro sa mga Maute group sa Lanao Del Sur kan nakaaging Marso 15, 2019.

Si Army Captain Joash Pramis, parataram kan 9th ID nagsabi an onra na tinao sa saindang tugang na soldados bilang pagsaludo sa saindang kabayanihan, pagdefensa asin sacrificio sa nangyaring pakikipaglaban sa Lanao Del Sur.

An familia kan mga soldados nakatalaan iproceso tolos an saindang marerecibing mga benipisyo arog kan burial benefits, financial assistance, educational benefits sa mga aki ninda asin iba pa.

An 49th IB kabale sa tolong mga batalyon kan 9th ID na pigdestino sa rehiyon kan Mindanao.