P36-B na infra proj sa Bikol paralisado
Ciudad nin Legaspi – Masara na an enot na cuarto sa fiscal year ngonian na 2019, an Department of Public Works and Highways (DPWH) sa Bikol paralisado na maka-implementar kan saindang mga proyecto sa infrastraktura hali sa P36 bilyon na budget ngonian na taon.
An dahilan an padagos pang pendienteng pag-aprobar kan Php3.7 trillion na General Appropriation Act para sa ngonian na taon huli kan nangyayaring controvercia sa Camara-Baja asin Camara-Alta.
Si Lucy Castañeda, opisyal na parataram kan DPWH Bikol nagpahayag sa entrevista kan Bicol Mail sa paagi nin telepono na dakul nang mga proyecto an na-isubasta kan huring cuarto kan 2018 alagad dai makapaluwas nin notice to proceed nganing iimplementar na kan mga nangganang contratista.
Hinahalat nalang kan DPWH Bikol an pagfirma ni Presidente Rodrigo Duterte sa 2019 national budget nganing magpaluwas na nin fondo an gobierno nasyonal sa mga proyecto na pendiente man sa gabos nindang Engineering District sa anom na provincia.
Oras na aprobado na an national budget puponan tolos kan DPWH Bikol an saindang mga proyecto mantang na-abala na sinda nin tolong bulan, sabi pa ni Castañeda.
Kan nagtalikod na taon 2018 an saindang budget nagcacantidad nin P42 bilyon alagad nagbaba an saindang budget sa 2019 na nag-aabot na sana sa Php36 bilyon.
An dahilan sa pag-gunting kan saindang 2019 budget mientras na iginilid muna si implementasyon kan mga road widening project sa tahaw kan dakul na mga ulang na estractura kabali na an mga poste kan cooperativa nin electricidad, dai maputol na puon nin kakahoyan sa sakop na national road na pigcocontra kan nagpapabistong environmentalist asin mga pribadong edficio na yaon pa sa laog kan road right of way. Sa ngonian re-enacted muna an saindang ginagamit na fondo mientras na padagos pang pendiente an saindang prosupuesto.
An problemang ini kan DPWH nangyayari man sa mga opisina rehiyonal kan Department of health, Department of Agriculture asin iba pang ahencia nasyonal na igwang opisina digdi sa rehiyon cinco. (DPAureus)