Pulis binadil gadan kan NPA

Ciudad nin Legaspi – An armadong rebeldeng New People’s Army (NPA) iyo an pigtutukdo kan awtoridad na responsable sa pagbadil gadan sa sarong miembro kan Philippine National Police sa Pilar, Sorsogon.

Sa inbestigasyon kan Pilar Municipal Police Station, sinabi ni Chief Inspector Malou Calubaquib an angulo sa pagbadil sa biktimang pulis na si PO3 June Razo, 52 anyos, gibo kan rebeldeng NPA mala ngani kinua pa si service na badil kan biktima.

Si Razo, naghatud sana kan saiyang esposa sa Calangoy Elementary School alagad mantang pasiring na sa jepatura de pulisya inabangan kan mga rebelde sagcod na binadil nin nagkaperang veces nin M-16 armalite asin kalibre 45.

Sinabi pa sa investigation report na pinaabot sa Camp Simeon Ola maatendir an biktima sa flag raising ceremony pakahale sa escuelahan naheling kaini na igwang ulang na kawayan an saiyang aagihan na tinampo kaya nagluway-luway sa pagmanijo kan saiyang motorsiklo.

Mantang nagtatago sa puon nin kahoy an mga NPA kan harani na sa mga ulang na kawayan an pagpadalagan kan motorsiklo kan pulis sunod-sunod na si putok sagcod na natumba an biktima.

Sinabi pa ni Calubaquib kan mayo na nin buhay an biktima kinua si sukbit na badil kan pulis na beretta 9MM pistol na may tolong magazines.

An biktima, sarong traffic enforcer asin midbid na estricto sa pag-implementar kan leyes sa trafico.

An makangerat na krimen kikundenar kan Camp Simeon Ola huli kan sa traydor na gawi asin pagbalga pa sa deretso humano.

Napag-araman sa 9th Infantry Division kan Philippine Army sa Camp Elias Angeles, an Sorsogon saro sa may mga lugar sa Bikol na kinukutahan kan kumunistang grupo.