Rep. Bordado, Legacion, De Asis nangenotan sa survey

March 28, 2019

Dai pa nagbabari an record kan Ateneo Social Science Research Center kan Ateneo de Naga University kun ano an resulta kan saindang survey iyo man an resulta sa eleksyon.


Alagad si assistant researcher Joshua Ruizo kan makaulay kan Bicol Mail, sinabi kaini na puedeng magkibrada pa an resulta depende sa isyu mantang masikad na an karampanyahan sa pirilian lokal sa Marso 29.


Sa pinaluwas na 2019 first quarter Ateneo Publication Poll, si incumbent Congressman Gabriel H. Bordado Jr., Bise Alcalde Nelson Legacion asin Consejal Cecilia ‘’Nene’’ De Asis iyo an mga nangengenotan na  napipili kan Naguenos sa maabot na pirilian sa Mayo 13.


Sa three-cornered congressional fight sa tercer distrito kan Camarines Sur si  Bordado (LP) nakakua nin 40 por ciento, nagsusunod sa saiya iyo si dating congresista Luis Villafuerte (NPC) na igwang 24 por ciento asin nag-iikatolo iyo si dating congressman Cho Roco (IND) na igwa sanang 14 por ciento. Alagad igwang 15%  an sagcod sa ngonian undecided asin 8% ma-abstain.


Si Legacion na nagdadalagan sa cargong alcalde nakakua nin 50.0 por ciento contra sa nagsusunod sa saiya na si Fortunato ‘’Tato’’ Mendoza igwang 24.0 por ciento asin nag-iikatolo iyo si dating consejal Luis Orega na igwa sanang 0.7 por ciento. Alagad igwang 18.3% nin Nagueños an mga undecided asin 7% ma-abstain.


An  campo  kan TM Smart ni Mendoza nagsabi man na dugay na an laban sa pirilian lokal mientras na mapuon pa sana an campaign period sa Marso 29 asin igwa sindang iluluwas na mga isyu laban sa City Hall.


Sa mga nagdadalagan na bise alcalde si Consejal De Asis nakakua nin 70.0 por ciento, nagsusunod sa saiya si Lito Miranda igwang 6.8 por ciento asin Felix Riva nakakua sana nin 0.3 por ciento mantang 14.8 por cientong mga undecided asin 7.8 por ciento nagsabi na ma-abstain sinda.

(Resulta sa survey sa mga consejal nasa english section)


Pigbasehan an public opinion poll hali sa veinte siete barangay kan ciudad asin sa 400 na mga respondiente.


Kabale pa sa resulta kan survey,  an pagtao nin trabajo asin livelihood dapat tawan man prioridad kan lokal na gobierno.


Sinabi pa na 43 por ciento sa ciudad an considerado an saindang sadiri bilang mga pobre. Alagad ini naglangkaw nin 4.5 por ciento kun ikukumpara kan nagtalikod na taon na 38.5 por ciento. (dpa)
 

Share on Facebook
Share on Twitter
Please reload