Mga sutil na chofer dai nakakasalbar sa LTO, PSO

Magkatuwang na an Land Transportation Office (LTO) sa Ciudad nin Naga asin kan Public Safety Office kan City Hall sa kampanya sa anti-colorum vehicle, roadside inspection operations, paglapag sa mga nagmamanijo na daing licensiya asin iba pang pagbalga.

Surprisa an saindang operasyon aldaw man asin maging banggui nganing magkadarakop na an padagos na nagsisinutil sa Acta Republika 4136 na mas midbid sa apod na Land Transportation Law, sabi ni LTO Officer Frederic Torecampo.

Estricto nindang pig-iimplementar si mga nagpapadalagan nin vehiculo na mayong licensiya sa pagmanijo na igwang multa nagcacantidad nin P3,00, nagpaso nang rehistrasyon inaabot nan in P12,000, motorista na dai nag-gagamit nin helmet cantidad P1,500 asin iba pang pagsinutil sa ley trafico.

An saindang joint operation base sa direktiva sa sainda ni LTO Regional Director Noreen San Luis-Lutey asin cada semana nagkakaigwa sindang operasyon sa Ciudad nin Naga maging sa luwas kan ciudad.

An aksyon kan traffic enforcers, kumfiscaron an saindang licensiya sa pagmanijo asin plaka huli kan pagbalga sa ley trafico.

Sa cada operasyon nakakadakop sinda nin sagcod sa sampulong mga sutil na chofer alagad dai man sinda makadulag, multa an penalidad sa sainda, sabi pa kan LTO.

Kabali pa sa saindang dinadarakop si mga motorsiklo na ginagamit bilang habal-habal mantang mayo man nin ley na sinda tinutugotan na magkua nin pasajeros.

Afuera kan LTO, PSO an Naga City Police Office (NCPO) sa pag-implementar ninda kan Comelec checkpoint dakul man an nagkakadarakop na colorum asin mayong licensiya sa pagmanijo.