Pagbuelta kan 3 batalyon kan 9th ID sa Bikol dai pa segurado

Pili, Camarines Sur - Puedeng ibuelta an tolong mga batalyon kan 9th Infantry Division kan Philippine Army sa Bikol alagad dai isasarabay defende sa kamugtakan kan paz y orden sa Mindanao asin kaipuhan pang aprobaran kan saindang higher command.

Ini an mangyayari oras na tugotan nang ibuelta sa 9th ID an tolong mga batalyon na dai pang kasegurohan kun nuarin aaprobaran kan AFP mantang sa ngonian an area of concerned kan gobierno iyo an Mindanao mala ngani na sa irarum pa kan martial law.

Si Army Col. Paul Regencia, jefe kan Division of Public Affairs kan 9th ID na may base sa Camp Elias Angeles, San Jose Pili, Camarines Sur nagpahayag kaini sa Bicol Mail kasunod kan kahagadan kan Regional Peace and Order Council asin Regional Development Council sa Bikol kan magkaigwa sindang joint meeting na ginibo sa Ciudad nin Legaspi dai palang nahahaloy.

Katuyohan kan RPOC asin RDC tanganing iwarak an tolong mga batalyon sa manlaen-laen na provincia kan Bikol ngonian na maabot na midterm elections para makatabang sa pagmantenir kan paz y orden sa panahon kan pirilian.

Sa joint meeting kan duwang consejo saro sa natukar iyo an armed conflict sa Kabikolan mientras na nagrarani na an pirilian sa Mayo 13, 2019 asin an saro sa problema kan mga nagcacandidato iyo an pig-iimplementar to permit to campaign kan CPP/NPA.

Kabale sa tututokan kan Philippine Army asin Philippine National Police iyo an pagmantenir na maseguro an katuninongan kan paz y orden sa provincia nin Masbate na cada eleksyon declarado kan Commission on Election bilang election hot spots mantang igwa pang nasa area of concerned na iba pang provincia sa rehiyon. (dpa)