COC ni Tallado pinapabawi kan Comelec
Daet, Camarines Norte – Marso 29, iyo an pagsikad kan karampanyahan sa mga candidato lokal alagad sa kaparejong petsa an First Division kan Commission on Election (Comelec) nagpaluwas nin desisyon na pinapa-cancelar na an certificate of candidacy ni Gobernador Edgardo Tallado.
An resolucion kan Comelec pinaboran an pigsangat na petisyon ninda Alcalde Senandro Jalgalado kan Capalonga, Camarines Norte asin Norberto Villamin.
Saindang pinapa-cancelar an COC kan gobernador huli ta naka-apat nang termino mientras na tinutugot sana an tolong termino sa mga elihidong opisyales lokal base sa Local Government Code.
Si Tallado nagpahayag nin pusog na pagtubod na babaliktadon kan Comelec en banc an enot na desisyon asin halawig pa an proceso kan caso sagcod na mag-arabotan sinda sa Corte de Apelasyon asin Corte Suprema.
Pig-aacusaran siya na pang-apat nang termino bilang jefe ejecutivo kan provincia alagad huli ta perang veces na siyang sinuspendi mala igwa pang desisyon sarong taon siyang pinapahingalo sa puesto asin nagribay sa saiya bilang gobernador, si Bise Gobernador Jonah Pimentel asin kan magsangat siya nin motion for reconsideration binawian an enot na desisyon kaya an bise gobernador naka-apat sanang bulan bilang gobernador asin buelta siya sa trabajo sa Capitolyo Provincial.
Saiyang pighalimbawa sa caso ni dating Presidente Joseph Estrada na naka-duwa sanang taon sa Malacañan kan mapatagbang sa puesto huli sa ika-duwang people power. Nagsangat siya ni petisyon sa Corte Suprema na dapat magpadagos sa pagcandidatong presidente huli ta dai niya natapos an termino.
An desisyon kan pinakalangkaw na corte pabor sa petisyon kan dating presidente alagad nadaog sa presidential election contra ki dating Presidente Noynoy Aquino.
Si Dr. Catherine Barcelona Reyes iyo an kalaban niya sa cargong gobernador kan Camarines Norte. (DPAureus)