Tolong armadong grupo sa Bikol gagamiton sa pirilian

Ciudad nin Legaspi – Tolong armadong grupo sa Bikol posibleng gamiton kan ibang mga politico ngonian na maabot na midterm elections tanganing macierto an kapangganahan dawa sa madugong paagi.

Si Brig. General Arnel Escobal, director rehiyonal kan Philippine National Police (PNP) sa Bikol nagbuyagyag na an tolong armadong grupo iyo an Concepcion group na nag-ooperar sa provincia nin Albay, Villareal asin Arizabal groups sa provincia nin Masbate, asin Mabulo group sa provincia nin Camarines Sur.

Parejo an saindang operasyon na bayadan na paragadan, robbery hold-up, kidnapping asin pangingikil. An jefe kan Bikol PNP nagsabi na igwa na sindang koordinasyon sa Fuersa Armada kan Filipinas sa actividades kan kumunistang insurhencia asin armed groups na pigkua nin mga politico.

Igwa nang ginigibong intelligence operation an Bikol PNP tanganing saindang ma-monitor kun siisay na mga nagcacandidato sa ngonian an maarkilang armed group tanganing gamiton contra sa saindang kalaban.

An pagsubaybay kan armadong grupo sa tolong provincia sa Bikol kasunod kan pagsikad na an campaign period sa mga candidato lokal na nagpuon kan Viernes, Marso 29.

Pigbuyagyag pa an sinambit na grupo nagpapamidbid pa na sinda mga rebeldeng New People’s Army para maka-colecta nin permit to campaign asin permit to win.

An nagdadangadang na pirilian sa Mayo 13, 2019 iyo an pig-aandaman kan PNP asin Philippine Army sa Bikol na igwa na sindang koordinasyon sa mga sa seguridad ngonian na panahon kan campaign period para maseguro an onesto asin matuninong na pirilian.

Nagkapera nang mga barangay sa Camarines Sur, Albay asin Masbate an nasa listahan na bilang area of concerned asin hot spot sa eleksyon.

Sa ginibong joint meeting kan Regional Peace and Order Council asin Regional Development Council saro sa natawan nin importancia iyo an problema sa armed conflict.

Liwat naman aktibo an rebeldeng NPA nganing maka-colecta nin PTC asin PTW sa mga candidato na nagiging estricto an PNP asin Army sa pag-monitor kan saindang mga operasyon.