Giyera nin mga Dinastiya (Villafuerte vs. Andaya)
Mas mainit pa kesa sa matinding El Nino an ralaban sa politika sa provincia kan Camarines Sur, an pinakadakulang provincia sa entirong Kabikolan.
An duwang lado na haros mayong daog sa vida politika, pareho poderoso asin makuarta iyo an masabatan sa primerong pagkakataon ngonian na eleksyon.
An naka puestong Villafuerte sa Kapitolyo sa Pili poon pa kan 1987 paka Edsa Revolution,hali sa gurang na Luis Robredo Villafuerte Sr. (LRV), nag sunod si Luis Raymond (LRay)Villafuerte Jr. asin an incumbent na si Governador Luis Miguel (Migz) Villafuerte, ka engkuentro si incumbent Congressman Rolando “Nonoy” Andaya Jr., siyam na turnong Congressman na mayong daog sa primer distrito kan Camarines Sur, presenteng chairman kan house appropriations committee , naguin majority floor leader, naguin, budget secreatary kan panahon ni GMA. Si Nonoy aki kaidtong depuntong Congressman Rolando Andaya Sr. kan Ragay, naguin budget under escretary ni Presedente Cory, pinaka-halawig na appropriations committee chairman sa estorya kan Pilipinas kan siya nabubuhay pa. Mayo man daog.
Ralaban ini kan daan na Nacionalista asin daan na Liberal. Poon kaidtong depuntong Mariano E. Villafuerte Sr. (ama ni LRV) kan tiempo Hapon asin sa balyong lado Mayor Tomas Andaya (ama ni Rolando Sr.) na harigui kan Liberal sa Ragay paka Liberation.
Mayong naghohona na magsasabatan an duwang ladong ini, Andaya vs Villafuerte.
Kan 1983 an “Apat na Aguila” kompuesto ninda Luis Sr., Ciriaco “Boboy” Alfelor, Edmundo B. Cea asin Rolando Sr.. surorog kontra sa Kilusang Bagong Lipunan ni Marcos na an lider kaidto si Gobernador Felix A. Fuentebella, chairman kan KBL sa Bikol.
An “Apat na Uwak” sinda Noli Fuentebella,Numeriano “Nonong” Trivinio, Salvador SP Bigay saka Col Lorenzo “Ching” Ballecer.
Bilang oposition kan panahon ni Marcos (Martial law) dinaog ninda an KBL. Pakatapos kan Edsa Revolution kan 1986 an “Apat na Aguila” naguin pusog na magka-alyado.
Nag-agui an halawig na panahon namantinir ninda an saindang poder sa politika asin gobyerno. Kaya dai maibitaran na magbangaan an duwang puersa.
Pareho dugong Bikolano, si Migz saka si Nonoy namundag sa Metro Manila, nag-ereskuela duman alagad nagpuruli digdi sa provincia.
Pareho naka-istar sa Ayala-Alabang (Muntinlupa City) pero si Nonoy nagtapos sa Ateneo de Manila University, si Migz saka si L-Ray sa De La Sal University (si LRV nagtapos sa UP Law, si Rolando Sr. nagtapos CPA-Lawyer sa UB-University Belt).
An media lokal asin nasyonal, patin mga politikal observers dai pa makatood, o masierto kun siisay an magana sa duwang lado ta pareho makusog, may bastanteng kapital, may poder, may koneksyon, asin pareho maisog.
Si LRV para congressman kan third district na sakop an Naga City kalaban si incumbent Congressman Gabby Bordado na tawo ni depuntong Jesse Robredo asin adopted ni Nonoy Andaya.
Si L-Ray incumbent congressman sa second district na sakop an Libmanan, pinaka-dakulang banwaan sa provincia, an kalaban niya si Maribel Andaya Eusebio dating Mayora kan Pasig City (Metro Manila) na tugang ni Nonoy, para congressman.
Sa first district an malaban para congresswoman si Marissa Andaya, agom ni Nonoy kalaban an sarong artista sa television na si Long Mejia kan “Ang Probinsiyano”.
An juven na si Migz Villafuerte kalaban ni Nonoy Andaya para Gobernador kan 35 banwaan kan Camarines Sur asin ciudad nin Iriga.
Ngonyan palang an bilog na provincia patos na nin tarpaulin asin billboards. Nagwawarak an mga polyetos, nagririlibot na sa pagkampanya an magka-ibong na lado.
An aire, radyo asin telebisyon, pano na nin jingles, pabantulin, asin paguiromdom kan ambos lados, pati sa social media.
Poon ngonyan labing sarong bulan antes kan pirilian sa Mayo 13, an iskor tabla o patas.
Sabi ngani kan sarong congressman sa Albay, sa higpit kan labanan kan duwang lado, Andaya vs Villafuerte, sa Camarines Sur, sarong relihiyon o sekta sana an mapagana o mapadaog kan arin man sa duwa.
An kadaklan nagmamasid sana pero dai pang desisyon kun kiisay maboto.
Nangangadyi an gabos na maguin matoninong an pirilian digdi sa Camarines Sur.
Manggana man logod si nadadapat.