Suplay nin kuryente sa pirilian, pigseguro

An apat na cooperativa nin electricidad sa Camarines Sur asin National Grid Corporation of the Philippines (NGCP) amay an mga ginigibong preventive maintenance sa mga linya kan kuryente asin transformer tanganing maseguro na mayong mangyayaring pagwara kan suplay nin kuryente sa panahon kan midterm elections sa Mayo 13.

Si Rinner Edmund Bucay, opisyal na parataran kan Camarines Sur II Electric Cooperative (Casureco II) nagpahayag sa entrevista kan Bicol Mail na nagkaigwa sindang miting sa Avenue Hotel kan apat na cooperativa nin electricidad sa provincia asin kan NCGP na pigtawan ninda duon na dapat seguradohon na mayong mangyayaring brownout sa panahon kan pirilian sa paagi kan saindang amay na gigibohon na preventive maintenance.

Si Administrator Edgardo Masongsong kan National Electrification Administration (NEA), dai palang nahahaloy nagpaluwas nin memorandum sa gabos na cooperativa nin electricidad sa nasyon na dapat ciertohon na zero brownout sa maabot na pirilian sa Mayo 13.

Maging an NGCP igwa nang amay na ginigibong pag-andam mala ngani nagkapera nang veces nagtalaan nin brownout sa apat na cooperativa sa provincia para sa saindang amay na maseguro na areglado an saindang serbisyo.

Sa ngonian segun ki Bucay an saindang Engineering Department igwa nang amay na ginigibong maintenance operation sa mga lugar na puedeng magkaigwa nin problema sa suplay nin kuryente.

An Commission on Election (Comelec) iyo an nagdireher sa NEA na dapat seguradohon kan saindang mga cooperativa nin electricidad sa nasyon na andaman an maabot na midterm elections na mayong mangyayaring brownout.

Katuyohan kan Comelec na dai maabala an dalagan kan pirilian sagcod sa escutenyo asin dai maapektaran an dalagan kan paz y orden dawa yaon an presencia kan mga miembros kan Philippine National Police asin Philippine Army. (DPAureus)