P4.1B target koleksyon kan RDO 65

Gigibohon an gabos kan Revenue District Office (RDO) 65 kan Bureau of Internal Revenue (BIR) sa Ciudad nin Naga na kayahon ninda an dugang na 70 por ciento target goal na koleksyon sa buwis hale sa dating P2.5 bilyon kan nagtalikod na taon 2018 envez isagad na sa P4.5 bilyon ngonian na 2019.

Ngonian na taon iyo an pinaka-dakulang target goal kan RDO 65 base sa direktiba kan saindang opisina central na dapat abuton an cantidad P4.5 bilyon na mas halangkaw nin setenta por ciento kumpara kan nagtalikod na taon.

Ini an mga pahayag sa entrevista kan Bicol Mail ki Monib M. Dimakuta, bagong jefe kan RDO 65 na nagsasakop sa veinte dos (22) na mga banwaan sa Camarines Sur kabale an Ciudad nin Naga.

Nagsusunod sana kami sa ano man na direktiba kan samuyang central office dawa na ngani magabat an orden mientras na mawot kan gobierno nasyonal na makakua nin dakulang koleksyon na madalagan sa mga proyecto kan presenting administrasyon Duterte.

An 60 por ciento kan saindang koleksyon sa buwis maghahale sa mga negosyante asin cuarenta por ciento hali sa empleados kan gobierno.

An bagong jefe kan RDO 65 nagsabi pa na saindang lalapagon si mga paradulag na magbayad nin obligasyon sa buwis alagad mantang bagohan siya digdi sa Ciudad nin Naga, aaramon niya an record kan opisina kun igwa pa kaini digdi sa Camarines Sur.

Kan Lunes, Abril 15 iyo na si ultimo diya sa pagplantiar nin annual income tax return kan mga empleados asin mayo nang plano an saindang central office na mag-extendir pa kan filling, sabi pa. (dpa)