PNP nakaalerto sa Semana Santa

Ciudad nin Legaspi. Nganing maseguro an matuninong na paz y orden, an Camp Simeon Ola nagdeclara nin red alert ngonian na Semana Santa mientras na rinibong pasajeros an nagpupurule sa kanya kanyang provincia digdi sa rehiyon.

Si Brig. General Arnel Escobal, regional director kan Bicol PNP nagpahayag na igwa na siyang instruksyon sa mga PNP Provincial Director na magwarak nin mga kapupulisan sa mga actividades kan simbahan sa mga prusesyon cada aldaw nin Juez asin Viernes Santo sagcod sa aldaw nin pagkabuhay ni Hesus.

Afuera kan dugang na destinong awtoridad sa mga bus terminal asin pantalan, an PNP katuwang kan Kabalikat Civicom, LTO asin kan DPWH Bicol sa iwawarak na mga motorist assistance sa national highway ngonian na semana santa.

Sinda andam na magtao nin asistencia arog kan mga narautan na vehiculos asin iba pang emerhencia. An Kabalikat Civicom nagbugtak na kan saindang motorist assistance kan Abril 15 hasta sa Mayo 30 asin kan April 17 sundo sa bulan nin Mayo an DPWH Bicol sa mga national highway kan Camarines Norte, Camarines Sur, Albay asin sa Sorsogon.

Sa Camarines Sur, an bantugan na Amang Hinulid sa banwaan nin Calabanga na dinadayo nin maabot sa on milyon na devotos cada aldaw nin Juevez asin Viernes Santo nagpadara nin augmentation force si Provincial Director P/Col. Roderico Roy Jr. tanganing makatabang sa pagmantenir kan paz y orden.

Si Alcalde Eduardo Severo kan Calabanga, CSur nagpahayag na duwang bulan pa preparado na an saindang actividad sagcod hinagad na ninda an tabang kan PNP para sa augmentation force nganing magmantenir kan paz y orden.

An Bicol PNP naglalaoman na dai papaki-araman kan mga rebeldeng grupo an panahon kan semana santa mantang kadakle sa sainda mga katoliko man. (DPA)