18.13% kan kaomahan apektado kan tag-init

Pili, Camarines Sur - Maabot na sa 31 mil hektarya o 18.13 por ciento kan 171 mil na hektaryang kaomahan sa Bikol an apektado kan naglalawig na init kan panahon asin apektado digdi an labi sa treinta mil na paraoma sa rehiyon.

Igwa nang total na P1.1 bilyones na lugi sa agrikultura asin naglalawig an El Niño Phenomenon naglalangkaw an production loss kabale na an ibang ataman nin hayop kan mga paraoma, sabi sa pinakahuring osip kan Departamento de Agrikultura.

Alagad si Ms. Emily Bordado, regional spokesperson kan DA nagtutubod na dai man na gayong apektado an produksyon nin paroy huli ta naabala sana nin duwang bulan an pagpataruk kan mga paraoma asin sa laog kan kaparejong peryodo aranihan naman nin paroy.

Nasa 18.13 por ciento an apektado kan El Niño sa total na kaomahan sa Bikol mantang an mayoria kan mga paraoma nagpadagos huli kan regular na patubig kan National Irrigation Administration (NIA).

Nagtutubod an mga agriculturist na an init nin panahon makakatabang sa kaomahan nganing mapalangkaw an produksyon asin mayong mangyayaring calamidad.

Sinabi ni Bordado sa paglaog nin tag-uran an mga paraoma puede nang magbisita sa saindang mga Municipal Agriculturist Office (MAO) para sa ayuda sa libreng banhi nganing makataruk tolos.

An Capitolyo Provincial kan Camarines Sur asin Albay parejong nagdeclara nin state of calamity nganing matabangan an sektor nin paraoma na apektado an saindang kaomahan.

Hagad lang kan ibang grupo nin paraoma na dai gamiton sa pamumutika an calamity fund kan gobierno asin seguradohon na si tunay na apektadong paraoma iyo an dapat matawan nin ayuda.