BCS pigruruso nin ribu-ribong pasajero

Bicol Central Station sarong semana nang pigpipilahan nin pasajeros viajeng Naga-Manila. (dpa)

Ribu-ribo pang pasajeros sagcod kasuodma an nagruruso sa Bicol Central Station (BCS) sa Ciudad nin Naga matapos kan semana santa, an naging solusyon kan manijamiento iyo an paghagad nin dugang na pampasajerong bus sa ibang mga bus company.

Dawa na dinagdagan nin buses na may rutang Naga-Manila alagad nagkulang-kulang pa giraray mala ngani halaba pa an nagpipirila nganing maghalat para makaseguro na makakapuli sa Manila hale sa saindang pagbakasyon kan nakaaging semana.

Si Nonoy Reforsado, manager kan BCS nagpahayag na kan nakaaging Sabado de Gloria na dating 200 buses sana an dapat magviaje alagad nagkulang pa sagcod naghagad pa sinda nin ayuda hali sa ibang bus company, inabot nin 354 buses an nakalarga asin nakalunad an maabot sa 15,930 na pasajeros.

Kan nakaaging Domingo, Abril 21 nakalarga an 370 buses asin nakalunad an 18,930 pasajeros pabuelta sa Metro Manila.

Kun an saindang average na ingreso nag-aabot sa P85,000 aroaldaw alagad kan nakaaging Domingo, Abril 21 nagsakat sa P148,230 na nagresulta kan paglangkaw kan saindang revenue, sabi pa ni Reforsado. An pagruso nin mga pasajeros digdi piglalaoman aaboton pa sagcod sa bulan nin Hunyo asin Hulyo asin saindang kinakarkulo an paglangkaw sa bulanan na ingreso nin sagcod sa P4.3 milyon.

An BCS masiyam nang taon pinapadalagan kan lokal na gobierno kan Ciudad nin Naga na pig-take over hale sa pribadong negosyante kan magtukaw sa enot na termino si Alcalde John Bongat.

An manijamiento pigtiwala kan jefe ejecutivo ki Reforsado sagcod na naghaman nin mga programa nganing mas maging epektibo an manijamiento asin comportable sa pasajeros.