Nigerians dakop, P18M na shabu nakumfiscar inako igwa pang mga kaibanan

Duwang Nigerian nationals natalikop sa drug buy-bust operation kan NCPO

Igwa pang apat na Nigerian nationals an pighahanting kan mga awtoridad matapos madakop sa Ciudad nin Naga an duwa nindang kaibanan sa ginibong drug buy-bust operations kan nakaaging Domingo, Abril 21.

Si City Director P/Col. Felix Servita Jr. kan Naga City Police Office nagpahayag sa media an duwang Nigerian nationals na saindang nadakop sa drug operations nagbuyagyag na igwa pa sindang apat na magkakaibanan na yaon sa Filipinas na maydara pang dakulang cantidad nin ilegal na droga.

Padagos pa an imbestigasyon kan NCPO sa posibleng igwa pang ibang kuneksyon an grupo sagcod sa mga local boys na iyo an nagbabariwas kan droga.

An duwang Nigerian nationals na sinda Mbaneto Sopuluchukwu na midbid sa alias na Herman Kurt Philip, 22 años, soltero na nag-eerok sa Acacia Estage, Manila na nadakop sa Brgy. Dinaga, Ciudad nin Naga asin Azubuike Obiaghanwa Onwigbolu, 32 años, na nag-eestar sa Ciudad nin Angeles asin nadakop sa Zona Tres, Triangulo kan ciudad na ini.

Kaibanan sa nadakop iyo si Judith Balaquiao-Camacho, 46 anos, asin residente kan San Jose, Bombon, Camarines Sur.

Sinda natalikop sa magkasuhay na buy bust operations kan nakaaging semana matapos kan mga ginibong pagsubaybay kan NCPO sa pinangenotan ni Lt. Col Errol Garchitorena jefe kan Intelligence Section, kairiba an Philippine Drug Enforcement Agency asin PNP Regional Office.

Nag-abot sa P18-Milyon an cantidad nin shabu an nakumfiskar sa duwang dayuhan asin sa mga kaibanan kaini sa magkasuhay na drug operations sa ciudad. Nakumfiscar ki Philip asin Camacho an nasa cantidad P680 mil na shabu asin ki Onwigbolu nagcacantidad nin labi sa P16-milyon na droga.

Antes naarestar an duwang mga dayuhan, si Benjamin Navarro Jr. kan San Alfonso, Pacol dating miembro kan PNP iyo an enot na nadakop sa ginibong buy-bust operation sa laog kan Room 215 kan Sampaguita Hotel sa Brgy. San Francisco, Ciudad nin naga asin kaibanan niya si Patricio Vivero y Bien kan Aeroville Subd, San Felipe parejo kan Ciudad nin Naga, na natalikop kan Abril 20, Sabado de Gloria. Nakumfiscar sa duwa iyo an tolong pakite nin shabu na nagcacantidad nin P102,000.