SA CASURECO II: Melit Candia pig-endorso maging permanenteng GM

Si OIC General Manager Emelita Candia kan Camarines Sur II Electric Cooperative (Casureco II) iyo na an matukaw na full fledged GM kan cooperativa oras na paboran kan National Electrification Administration an endorsement sa saiya kan junta directiva.

‘‘Unanimous an resolucion kan junta directiva na nag-eendorso sa OIC GM na gibohon nang general manager’’

Si Director Angelito Cornelio Jr. kan Naga North District nagpahayag sa entrevista kan Bicol Mail an saindang rekomendasyon pigsumiter na ki NEA Administrator Edgardo Masongsong na naghahalat nalang sinda kan magiging aksyon alagad depende sa administrador kun bubukasan sa iba pang interesadong aplikante sa posisyon.

‘‘Kun i-open sa ibang aplikante dai man macontra an junta mientras na calificado man sa posisyon si Candia’’, sabi pa ni Cornelio.

An marhay na acomplisimiento bilang OIC GM asin pagpadagos kan halangkaw na categorization kan cooperativa iyo an mayor na isyu kan junta directiva nganing saindang eendorso sa NEA na tukahan na bilang permanteng general manager.

An resolucion kan junta na pinamamayuhan ni Paul Sta. Ana inaprobaran matapos kan anom na bulan niya bilang Officer-In-Charge na nagribay ki dating Project Supervisor/General Manager Nelson Lalas. Si Candia, pigtukahan kan NEA bilang OIC General Manager kan Oktubre 15, 2018.

Nag-atubang nin controbersiya an dating manijamiento ni Lalas huli ta dai pigtawan nin prioridad si relokasyon kan mga electrical post sa mga road right of way sa pig-iimplemementar na road widening project kan Department of Public Works and Highway (DPWH).

Envez kan pagbalyo kan mga electrical post an saiyang pigtawan nin prioridad iyo an pagbakal nin milyones pesos na cantidad nin mga transformer.

Kan magtukaw si Candia, saiyang pigtawan nin atensyon na iimplementar na an relokasyon kan mga poste kan cooperativa asin nagpapadagos na sa ngonian mantang piglalaoman matatapos sa Hulyo 2019. Afuera pa kaini, an programa sa pagpabulos nin suplay nin kuryente sa barangay na mayo pang ilaw pigpunan na sa Barangay Matandang, Siruma, Camarines Sur.

An programa sa enerhia sa barangay dapat pigpunan kan panahon ni Lalas alagad pinabayaan. (DPAureus)