SA CONGRESO: Bicol bloc maggibo nin resolucion vs bus ban

Itutulod kan sarong lehislador sa Camarines Sur na magkasararo sindang mga miembros kan Bicol bloc sa Camara-Baja nganing maggibo nin resolucion na pusog nindang pigcocontra an plano kan Metro Manila Development Authority (MMDA) na ibawal an provincial buses na maglaog sa EDSA envez magbalyo kan saindang bababaan sa transport terminal sa Santa Rosa, Laguna.

Si Congresista Gabriel H. Bordado Jr. kan tercer distrito kan Camarines Sur nagpahayag na mantang pigpunan na ini ni Congresista Joey Salceda kan Albay dapat magkasararo sinda nganing magpaluwas nin opisyal na panindugan contra sa plano kan MMDA.

‘’Unfair man po ini, unfair man na marhay mababa sa Sta. Rosa, Laguna harayuon maabot pang cuarenta (40) kilometros an distancia asin ini pasakit sa mga pasajeros haling Bikol maging sa Visayas orog na kun kadakul-dakol na bagaje pasiring sa Manila’’, sabi pa.

Sa paagi kan resolucion kan Bicol bloc, digdi maheheling an panindugan kan mga Bikolano nganing ipaheling an pusog na panindugan contra sa plano kan MMDA.

Nagtutubod si Bordado sa tuyaw kan publiko asin editorial kan ibang mga diaryo na bako man buses an nakakakrear kan trafico sa EDSA alagad an mga pribadong vehiculos.

Dapat bawion ini kan MMDA huli ta malinaw na anti-poor, segun pa sa congresista kan tercer distrito kan Camarines Sur.

Sinda Congresista Fernando Gonzales kan tercer distrito kan Albay, Ako Bicol Rep. Alfredo Garbin asin Congresista Salceda enot nang nagpahayag na dapat ibasura na kan MMDA an pagbawal na maglaog an provincial buses sa rutang EDSA.

Pinahayag pa ni Bordado na saiya nang pinaabot an isyung ini ki Catanduanes Rep. Cesar Sarmiento, pamayo kan House Committee on Transportation huli ta rinibong pasajeros aroaldaw an apektado asin grabe an planong ini kan MMDA na bakong makatawo.

Napag-araman an komite nagpasar na nin resolucion na hinuhurot sa MMDA na igilid muna an implementasyon sagcod na dai pa sinda nagpapaapod nin committee hearing sa controbersyal na isyu.

Sa pinaluwas na estatistiko kan Department of Transportation, igwang maabot sa 2.8 milyon na mga vehiculo sa National Capital Region kumpara sa provincial buses na nag-aabot sana sa cuatro mil, huli kaini dai sinda tubod provincial buses iyo an nakakakrear kan problema sa trafico.