Suba-Suba kun Sa’lan, Swak na Swak kun Tamaan

An mga incumbents o mga nakatukaw na re-eleksyonista nakaka- ventaje sa mga kalaban ta may organisasyon, may tao, may fundo, kun toltol asin marhay an guibo. Alagad kun pasaway, sorry.

Sa ibong na lado, an challengers o kalaban kan incumbents, daklag sanang daklag nin gapo, tuyaw sanang tuyaw. Ang mga promise mayong kasigurohan.

Huli ta’’ all politics is local’’, mas makunswelo, mas makolor,mas mainit an bakbakan sa mga probinsya, ciudad asin banwaan.

Sa itaas, sa pagpili kan 12ng mga senador haros labanan ini kan mga kandidato kan Presidente kan Pilipinas kontra sa mga kandidato kan opposisyon.

Simple man lang an isyu sa eleksyon national, Duterte vs anti-Duterte. An ibang kandidato magana dahil sa name recall arog ki Grace Poe, Cynthia Villar, Sonny Angara, JV Ejercito, Mar Roxas Pia Cayetano asin posibleng si Bam Aquino.

Pero an mga personal na manok ni Digong arog ki Bong Go, Bato Dela Rosa, Raffy Alunan,Ieme Marcos asin Francis Tolentino makukusog man na marhay.

May saderi man na fuerza na mga independiente Glenn Chong saka Willy Ong. Pero Harabo na baga ang mga tao na magboto sa mga kandidatong hali na sa laog kan preso, maski nakafianza asin dai pa sentensyado.

An maguiguin resulta kan eleksyon sa senado iyo an futuro kan politika ni Digong asin kan Pilipinas mismo. Sa mata kan tawo, referendum ini kan klase kan goberno ni Digong. Kun makontrol nya an mayoriya kan senado asin Camara de representantes,dagos an charter change (cha cha) asin federalismo.

Sa mga congresista man garo mayoriya sa interong nasyon kampi sa administrasyon. Pero digdi sa Bicol halo-halo.

Sa Camarines Norte banga, may yellow, may pro-PRRD, sa Camarines Sur gabos pro-Digong pero an mga dinastiya magkaralaban (Villafuerte, Alfelor, Andaya, Fuentebella), sa Albay si Congressman Edsel Lagman sana an oposisyon, pero an aki niya na kandidato para vise-gobernador kaalyado ni Governor Francis Bichara na maka-Duterte. Sa Sorsogon Escudero country ngonyan maguin an kapitolyo asin mga kandidato para sa kongreso. Sa Masbate asin Catanduanes iyo man.

Haros nasisiguro na an pagbabago kan gobyerno. An hapot na lang kun siisay an masusunod, an senado, Camara de representantes o an Presidente.

Sa mga gobernador asin mayor an labanan personalidad pero pakatapos kan eleksyon an magana madukot man guiraray sa Malacanang.

Mentras tanto ngonyan na mga ngonyan padagos an garastosan, padagos an ribok kan mga auto kan mga kandidatong naglilibot, sa mga caucus, asin mga miting de-avance, kita man na mga botante masid-masid, atid-atid, halat-halat kun siisay an more money, more campaign funds asin pero lesser evil. ***** Partilist Galore: A Teacher na dara ni Elaine Parma Orong, CWS ni Manny Gallardo, Ana Kalusugan ni Ower Andal, Ang Probinsiyano ni Jimmy Areola, Bahay Partlist ni Jun Ragrayo asin Malou Caneba, TGP Partylist ni Bong Teves,Philreca kan Casureco, An Waray ni Jovy Gonzales, Ako Bicol ni Pidong Garbin, Kabayan ni Jenis Nedea, Bayan Muna. Gabriela, Association of Concerned Teacher o ACT, One Pacman, Una an Edukasyon ni Bong Bilaro,Ruel Clemente asin Russel Rosero, etc…etc… sana manggana gabos. ***** Habang nagrarani an eleksyon, mayo nang kahulugan an mga komentaryo sa radio, advertisement sa diaryo, radio asin tv, bugbog na an talinga kan ribok asin buladas kan mga politiko asin komentarista, mas marhay pang maglaog kita sa simbahan asin mag-arang kan mas marhay asin malinaw na pasabong pag-abot kan eleksyon, bahala na an Mahal na Diyos.