Bullet train, marerealisar sa ‘22
Magkakaigwa nang Bicol Bullet Train Transport System sa irarum kan Build, Build, Build program ni Presidente Duterte kasunod kan asegurasyon na tataposon an modernisasyon kan Philippine National Railways (PNR) antes matapos an taon 2021 asin magiging operational sa 2022.
An south railway papaliputon an oras kan viaje na dating inaabot nin walong oras envez magiging nang tolong oras na igwang speed na 160 kilometer per hour asin barato pa an flete kumpara sa mga buses.
An fondo na cantidad P175 bilyon hale sa inutang kan gobierno Filipinas sa nasyon kan China asin anom nang bulan nagsikad an proyecto puon sa Calamba, Laguna, sabi ni PNR General Manager Junn Magno sa saiyang pag-atubang sa miembros kan media sa Ciudad nin Naga kan Martes, Mayo 7.
Haling Manila sundo sa Ciudad nin Legaspi asin sa provincia nin Sorsogon an konstruksyon kan proyecto na tatawan nin prioridad na makatrabajo digdi iyo an mga Bikolano.
Saiyang sinabi na katuwang digdi nganing marealisar an bilyones pesos na cantidad kan modernong perokaril iyo si dating Presidential Assistant to the President (SAP) Bong Go asin suportado kan Ako Bicol Party-list (AKB).
Riribayan nin bullet train an kotse kan PNR na loma nang marhay na pigpunan na gamiton kan taon 1917 na hale pa sa nasyon kan Japan. Ginigibo na an bagong desinyo kan track para sa speed na 160 kilometer per hour asin saindang iluluwas sa publiko oras na matapos ini, sabi pa.
Nakatalaan iimplementar an standard gauge arog kan mga train sa ibang mga asensado nang nasyon.
Pig-osipon pa ni GM Magno na naghahanap na sinda nin lote sa Ciudad nin Naga asin Legaspi para sa bubukasan na training center na prioridad an mga Bikolano nganing matukdoan sinda kan klaseng trabajo sa gigibohon na modernong PNR.
Sa isyu kan mga squatter o si mga nag-eestar sa gilid kan relis, sinabi pa na kabale ini sa saindang tatabangan asin kan mga LGU para sa relocation kan apektadong residentes.
Pera nang decada an pigplanong rehabilitasyon kan perokaril dai narerealisar puon pa kan panahon kan mga nakaaging Presidente na sinda, Corazon Aquino, Fidel Ramos, Joseph Estrada, Gloria Macapagal-Arroyo asin Noynoy Aquino III, alagad piglalaoman na madadagos na sa administrasyon Duterte.
Nagtao pang asegurasyon an general manager sa mga Bikolano na mantang igwang political will an presenteng administrasyon dapat matapos an proyecto antes matapos an Deciembre 2021.
An PNR dakulang bagay sa rehiyon Bikol para sa turismo, trabajo, transportasyon, agrikultura asin makakaina pa sa gabat kan trafico sa Manila, sabi pa ni Magno. (DPAureus)