Testing, sealing kan VCMs sa CamSur, ‘successful’

Ocampo, Camarines Sur. Dai nag-aberiya an mga ginamit na vote counting machines (VCM) sa ginibong final testing and sealing (FTS) sa banwaan na ini na igwang 39 clustered precinct kan veinte cinco mga barangay para sa maabot na pirilian sa Mayo 13.

‘‘Successful’’ an FTS na pigparticiparan nin sampulong botantes sa precento, sabi ni Alex Marpuri, Election Officer kan munisipyo kan Ocampo asin opisyal na parataram kan Comelec Camarines Sur.

Segun ki Marpuri digdi sa Camarines Sur sa banwaan nin Ocampo iyo an pig-enot na ginibo asin sa Ciudad nin Legaspi, sa provincia ni Albay magkasuhay na pigkunducir kan Lunes, Mayo 6. Nagasunod man sa iba pang mga banwaan sa CSur.

Kasoodma ginibo man sa Daraga, Albay na nasa Comelec control matapos likidaron si Party list Rep. Rodel Batocabe asin an saiyang police escort.

Sinabi pa na an envueltong sampulong botantes na nagboto sa polling center binilang nin manwal an balota asin pigkumpara sa resulta sa makinarya na nagparehas si resulta kan boto.

An ginamit na VCM winalat na sa escuelahan alagad igwang mga bantay na tanod asin miembros kan PNP. Katuyohan kan FTS nganing maaraman an accuracy asin kun functional an VCMs asin naheling kan publiko sa paagi kan mga nagparticipar na botantes, igwang mga watchers, miembros kan electoral board asin residentes kan barangay na naging testigos sa saindang testing, sabi pa kan Comelec.

Dinagdag pa kan Comelec na si saindang mga ginamit na opisyal na balota iyo man an gagamiton sa pirilian sa Mayo 13.

An testing asin sealing pigpunan na gibohon kan Comelec kan Mayo 6 hasta sa Mayo 11 sa manlaen-laen na rehiyon nganing amay nindang maaraman kun igwa pang problema sa mga gagamiton na makinarya. (dpa)