Apat na alcalde sa CSur na sinuspende gana sa pirilian
Apat na mga alcalde na bakong kaalyado kan Capitolyo Provincial kan Camarines Sur na sinuspende sa inaatubang ninda nin caso administrativo anas ganador sa nagtapos na midterm elections.
Sinda Alcalde Tomas Bongalonta kan Pili, Bernard Brioso kan Libmanan, Jimmy Deleña kan Presentacion asin Nelson Bueza kan Garchitorena nakalamang nin mas dakulang boto kan nakaaging 2016 local election kumpara kan pirilian kan Mayo 13.
Nagtutubod sinda na an liwat nindang kapangganahan malinaw na dai suportado kan saindang namamanuan na saro sanang political harassment sa sainda kan gobierno provincial mantang bako sindang kaalyado sa politica.
Sinabi man ni Alcalde Brioso na kun nakalamang sana siya nin labi sa dos mil na boto kan 2016 election alagad ipinaheling kan saindang namamanuan na dapat magpadagos siya sa puesto mala ngani nakalamang nin maabot sa nieve (9) mil boto contra sa saiyang naging kalaban na si bise alcalde Rommel Bulaong.
Sa resulta sa pirilian sa Libmanan, si Brioso nakakua nin 27,357 boto asin si Bulaong igwa sanang 18,829. Maging si mga consejal na iyo an nagparibok sa sindang banwaan anas nagkadaraog, sabi pa.
Si Vokal Badong Simando na iyo an pamayo kan komite sa nag-iimbestigaran sa mga caso administrativo sa Sangguniang Panlalawigan enot nang nagsabi na dai man sinda nahaman nin resolucion para sa preventive suspension kun mayo sindang pigbabasehan na mga evidencia.
Huli kan sunod-sunod na suspension an apektado iyo an namamanuan na nauulang an implementasyon kan mga proyecto, segun pa ki Brioso.
An kaparejong reclamo kan jefe ejecutivo kan Libmanan, nangyari man sa Pili, Camarines sagcod nagkakagurotom an mga empleados sa dahilan na dai nakakasueldo sa tamang kinsenas.
Pinahayag man ni Bongalonta na an desisyon kan mga botantes sa nagtapos na pirilian, sarong leksyon sa mga kalaban sa politica na hinahanapan sinda kun ano-anong dahilan huli sana sa politica.
Sa reaksyon man ni Board Member elect Awel Llaguno kan Partido district, sinabi kaini na dai siya uyon sa mga political harassment asin dapat adalan na marhay an caso antes magdesisyon an komite.