Imported rice kan NFA limitado na, sabi

Pili, Camarines Sur – Sagcod na sana sa Agosto 2019 an stock nin imported rice kan National Food Authority (NFA) sa Camarines Sur asin limitado na an saindang pagsuplay nin bagas sa mga mercado.

Igwa na sanang noventa (90) mil na sakong bagas an saindang stock sa bodega mantang pinapundo na kan saindang opisina central an pag-angkat nin bagas kasunod kan pag-epekto kan Rice Tarrification law (RTL)

Nag-epekto na an implementing rules and regulations (IRR) kan Abril ngonian na taon kan RTL asin yaon na sinda sa reorganizational plan sa mga empleados na ciertong hahalion sa serbisyo asin matatada.

Sinabi ni NFA Provincial Manager Alan Sabaybay dawa igwang mga pagcontra an mga empleados kan ahencia alagad mayo sindang magiginibo sa pagsunod kan ley sa RTL. Dakul an mawawaran nin trabajo alagad babayadan sinda kan tamang mga benipisyo.

Hinalian na sinda nin regulatory power kan RTL arog kan pagsuplay nin bagas sa mga mercado, pag-isyu nin licensiya sa mga rice retailers, pag-inspeksyon asin pagmonitor kan suplay nin bagas sa mga mercado.

An sainda na sanang trabajo iyo an pagtungod nin paroy sa mga paraoma nganing sarayon sa bodega asin kun igwang mga calamidad iyo man an idisistrubuer sa mga lokal na gobierno asin Department of Social Service and Development (DSWD), sabi pa ni Sabaybay.

An RTL tinatawan nin buelo an mga pribadong higanteng negosyanteng bagas na iyo na an mag-aangkat nin bagas sa ibang nasyon mantang sinda na an mapabakal asin masuplay nin bagas sa mga mercado.

Alagad an reclamo kan National Confederation of Irrigators Association asin iba pang grupo nin paraoma sa nasyon an natawan nin pabor kan ley iyo an mga darakulang negosyante alaagd an paroy kan mga paraoma mabagsak an presyo.

Si Senador Cynthia Villar, pamayo kan Committee on Agriculture sa senado iyo si padreno kan bill sa senado sagcod na inaprobaran ni Presidente Rodrigo Duterte.