Migz gana vs Andaya

Pili, Camarines – Liwat ginana kan re-eleksiyonistang Gobernador Migz Villafuerte an resulta kan pirilian sa Camarines Sur laban ki Majority Floor Leader Rolando Andaya Jr. na nakalamang siya nin nasa saes (6) mil boto na nakatalaan nang iproklamar kan Provincial Board of Canvassers alagad nakaabala sana iyo an duwang presinto hali sa Cabusao asin San Jose.

Dai naging landslide an saiyang kapangganahan kumpara sa enot niyang laban na eleksyon lokal sa kargong gobernador matapos magluwas an resulta hali sa primer, segundo, tercer asin sa cuarto distrito nakakalamang nin boto si Andaya alagad nakasakdo si Migz nin dakulang boto sa ika-limang distrito na binayaan niya nin labi sa veinte (20) mil boto si Andaya sagcod na nabawi niya si hababang boto hali sa apat na congressional district.

Nagpasalamat an gobernador sa mga taga Camarines Sur kasunod kan saiyang kapangganahan sa ika-tolo asin ultimong termino bilang jefe ejecutivo kan provincia.

An saiyang running mate an nagbabalik na bise gobernador Imelda Papin iyo an nanggana alagad sa mga miembros kan junta provincial anom an saiyang kaalyado sa PDP-Laban asin an apat hali sa NPC sa grupo ni Andaya.

Sa premir distrito si Tresie Clemente (NPC); sa segundo distrito sinda Mulo Hernandez asin James Jaucian (PDP-Laban) sa tercer distrito sinda Angel Naval asin Nelson Julia (PDP-Laban); sa cuarto distrito sinda JJ Pilapil asin Awel Llaguno (NPC); sa ika-limang distrito sinda Manny Noble asin Rex Oliva (PDP-Laban) asin si Ruperto Alfelor (NPC).