2 ECs mapalangkaw tarifa
Duwang mga electric cooperative (ECs) sa Camarines Sur nagkumfirmar na mapalangkaw nin singil sa tarifa sa kuryente sa ipapaluwas na electric billing ngonian na bulan nin Mayo 2019 nganing ipasa sa miembros-consumedores an halangkaw na presyo kan kuryente na saindang binabakal sa mga power supplier.
Alagad napag-araman bako lang sa duwang cooperativa na mapatong nin 83 centavos hasta dos pesos cada kilowatt hour envez sa iba pang mga provincia sa rehiyon Bikol epekto kan pagbakal ninda nin halangkaw na presyo kan suplay nin kuryente.
An Casureco I asin Casureco II nagpahayag sa Bicol Mail na bulan pa nin Abril ngonian na taon naglangkaw an presyo nin kuryente sa saindang mga power supplier huli kan padagos na pagnipis nin kuryente asin napipiritan sinda na magbakal sa mas halangkaw na presyo sa Wholesale Electricity Spot Market (WESM).
Sa Casureco I, sinabi ni General Manager Ann Sylvia Alsisto na si dati nindang tarifa na diez pesos cada kilowatt hour mapatong sinda nin dos pesos asin sa Casureco II, sinabi kan saindang opisyal na parataram na si Rinner Bucay, an dati nindang P10.18 sa residential nagpatong sinda nin 83 centavos cada kilowatt hour asin parejo man an saindang ipapatong sa industrial consumers.
An duwang ECs naglinaw na aprobado kan Energy Regulatory Commission (ERC) an saindang dugang na tarifa alagad ini temporaryo sana oras na magbuelta an dating presyo kan saindang mga power supplier.
An Liwang Power Premier Corporation asin an San Miguel Energy Corporation (SMEC) iyo an power supplier kan Casureco I na nagpapalya an planta kaya napiritan sinda na magbakal kan halangkaw na presyo sa WESM.
Sa Casureco II, an saindang power supplier iyo an SMEC na nagpalya man an planta. An ika-duwa nindang supplier iyo an AES Masinloc Power Corporation na nakakabakal pa sinda nin 28 megawatt asin an Bicol Mini Hydro, saro sanang megawatt an saindang nakukua.
Kun dati nakakabakal sinda nin 10 megawatt sa SMEC alagad sa ngonian 5 megawatt asin an kakulangan hali na sa WESM na mas halangkaw an presyo, sabi pa.
An paglangkaw kan singil sa tarifa kan ECs nagsasabay na sa padagos na paglangkaw kan presyo sa produkto nin petrolyo.