41 kaharongan pinalakma nin ipu-ipo
IPU-IPO nagdestrosong kaha-rongan sa mga barangay kan banwaan nin Libmanan, Pamplona asin Canaman, gabos sa Camarines Sur. (MDRRMO Libmanan, CSur/V. Coliflores)
Maabot sa cuarenta y uno (41) kaharongan sa Camarines Sur pinalakma nin ipu-ipo na may kusog nin duros na kinakarkulong 100 kilometer per hour kan Martes na hapon (Mayo 22) sa mga barangay kan Pamplona, Libmanan asin Canaman mantang saro an pig-osip na iredo.
Nagrapado nin biglaan asin makusog na duros mag-aalas dos nin hapon hali sa magkataid na barangay Malansad Viejo asin Mambulo Viejo kan Libmanan, CamSur asin nagdalagan sa Poblacion, Pamplona.
Duwang harong an nadestroso sa Brgy. Malansad Viejo, sarong pump house asin viente (20) kaharongan sa Mambulo Viejo an iba enterong nagkagaraba asin igwang tinuklab sana si atop.
Si Ruel Tormes, jefe kan Municipal Disaster Risk Reduction Management Office kan LGU Libmanan nagsabi nagkabirigla an mga residentes kan duwang barangay sagcod na naghanap nin masisirongan nganing makaibitar sa aksidente.
Sunod-sunod si makusog na kikilat na garong nagbabaradilan sa barangay asin dai naghaloy nagbulos nin makusog na uran, sabi pa ni Tormes.
Sa osip sa sainda kan mga residentes, pigpahayag na posibleng maabot sa 100 kilometer per hour an rapado kan duros na inaabot nin treinta minutos kaya dakul an nadestrosong kaharongan na tolos man pigpadarahan nin ayuda kan lokal na gobierno.
Mayo man nin iredo sa biglaan na calamidad sa duwang barangay na an apektado si mga harong na gibo sa light materials, sabi pa.
Pakahale sa Libmanan, an ipu-ipo nagdalagan sa Zona 6 kan Barangay Poblacion, Pamplona, CamSur na pigpahayag na anom na kaharongan an nadestroso mayong maginibo an mga yaon sa laog kan kaharongan na gibo sa light materials nagsirong sa lamesa.
Alagad sarong Mrs. Carmelita Manlangit an nairedo matapos tamaan kan naglalayog na kahoy an saiyang bitis.
Nagluya na si duros kan ipu-ipo naglawig na sana digdi nin kinse minutos. An LGU nagpadara man nin ayuda sa mga apektadong familia.
Mga alas 4:00 nin hapon nabuhay naman an ipu-ipo asin nagbalyo na sa barangay Palo, Canaman, Camarines Sur.
Sinabi ni Mario Alma, pamayo kan MDRRMO na treceng mga harong an nadestroso kabali na si mga tinuklab si kaatupan alagad mayo man nin iredo.