KAOGMA
An pinaka-enot na pakulo ni Luis Robredo Villafuerte Sr bilang OIC-Governor kan 1986 paka EDSA Revolution iyo an Kaogma Festival. Naka-istar pa siya kadto sa sa saiyang residencia sa barangay Balata, ciudad nin Naga.
An centro kan celebrasyon sa Plaza Rizal na kadto sakop pa kan Provincia nin Camarines Sur.
Si depuntong Bokal Toyong Aguilar, saro sa mga alipores ni LRV, iyo an coordinator kan celebrasyon.
An mayor na toyo kan Kaogma Festival iyo an mapaogma an mga paraoma.
An mga paraoma hali sa 35ng banwaan kan Cam Sur, Naga asin Iriga City mina tiripon sa Plaza na pig-aapod man na Rizal Freedom Park. Apwera kan parada sa palibot kan ciudad may baraylihan pa sa palibot kan monumento ni Rizal. An mga exhibits mga produkto agrikultultural arog kan mga gulayon, mga prutas, mga sira, mga hayop asin iba pang mga produkto asin ataman kan mga paraoma.
An mga pighahalat kan publiko iyo an mina garana sa pa-contest arog kan pinaka-halabang talong, pinaka-dakulang kalabasa, pinaka-dakulang karpa, pinaka-dakulang talusug asin iba pa.
An Naga City kaya dating cavesera kan provincia nin Camarines Sur, pig-aapod Ciudad de Caceres iyo an centro kan Simbahan Katoliko sa enterong Kabikolan. Ini an regional center kan Bikol sagkod 1955 kan an Pili iyo na an naguin capital town. Pero an mga taga Camarines Sur, pinaka-dakulang provincia kan rehiyon sa Naga man gabos nagtitiripon haros aro-aldaw---- magsimba, mag-eskwela, mag-empkleyo, magsine, magkakan sa restawrant, asin magdara nin mga paninda sa mercado publiko kan Naga.
Kan panahon na idto poon kan maguin Charter City an Naga kan 1948 garo sararo sana an residentes kan Naga asin Camarines Sur.
Bistado an Naga sa enterong kinaban kan makolor asin maogmang celebrasyon kan Penafrancia Fiesta kada bulan na Setyembre. Naka-istar sa ciudad nin Naga an antigong imahen ni Nuestra Senora de Penafrancia, an “Ina” o Patrona kan Bikol.
Kan mag-abot an mga Kastila sa Bikol an Archdioce of Caceres dakulaon na marhay poon sa Samar sagkod sa boundary kan Nueva Segovia o Ilokandia. An Naga City o Ciudad de Caceres an ikatolong pinaka-gurangan na ciudad sa enterong Pilipinas, nagsusunod lang sa Manila asin Cebu.
An populasyon kan Naga mas dakula sa Legaspi City,an pig-aapod na regional center ngonyan. An populasyon kan Camarines Sur asin Camarines Norte, an kadagaan kan duwang provincia, haros kapareho lang o tibaad mas dakula pa sa pinagsararong provincia kan Albay, Sorsogon, Catanduanes asin Masbate.
Pero poon ngonyan na taon an Kaogma Festival poon Mayo 21-27 (Mayo 27 an foundation day o birthday kan Camarines Sur, non-working holiday sa Naga, Iriga asin Camarines Sur) dadarahon duman sa Ciudad nin Iriga sa Rinconada.
Kan 1992 kan magpoon bilang Gobernador si Luis LRay Villafuerte Jr hinali sa Naga an Kaogma asin dinara sa Pili, an Capital Town.
An celebrasyon sa laog kan capitol grounds, enot sa convention center sagrod sa CWC.
Ngonyan na taon sa ultimong turno ni Governor Miguel Luis Villafuerte 3rd nagdesisyon an joven na governador na darahon an Kaogma sa Iriga, an centro kan Tinagba.
Kun may politika o mayo an desisyon ni Migs Okay lang total an Rinconada parte pa man kan Cam Sur.
Kun an mga taga Naga kadto minaralakaw pasiring Capitolyo makadalan lang kan mga artista na imbitado ni LRay haling Manila ngonyan daa an mga taga Naga, taga Pili asin hali sa 35ng banwaan kan Camarines Sur libre an sasakyan pasiring sa City of Superstars.
Aramom tadaw kun arin an mas pinaka-maogma, sa Naga, sa Pili, o sa Iriga?